2018 senesi ilk yaz (iyün) 19 künü Ukraina Prezidentiniñ Qırım MC Daimiy Temsilcisi Borıs Babin ve onıñ Birinci muavini İzet Gdanov Qırımnıñ ğayrıdan integratsiyası ve işğalden azat etilüvı, yarımadada rusiye istilâsına qarşılıq kösterüv, Ukraina Prezidentine mütenasip tekliflerni taqdim etüv ile bağlı meseler üstünde devriy çalışuv boyunca Yüksek seviyede iş gruppasınıñ  oturışını keçirdiler.

Oturışnı açar eken, Ukraina uquqiy ilimler milliy akademiyasınıñ Prezidenti akademik Oleksandr Petrışın Temsilcilikniñ ğayretlerine yüksek qıymet kesti ve teklif etilgen vesiqalarnıñ ameliy kerekligini ve yüksek adliy keyfiyetini qayd etti.

İş gruppasınıñ oturışında merkeziy akimiyet  organlarınıñ teklifi ile Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarınıñ qorçalav boyunca 2018-2019 seneleri içün acele areket Planı üzerinde çalışuvnıñ neticeleri muzakere etildi.

Bundan da ğayrı, toplaşuv devamında havfsızılıq ve uquq qorçalav, vaqtınca işğal etilgen torpaqlarğa qanunsız taşımalarğa qarşılıq kösterüv saalarında esas tedbirler muzakere etildi. İş gruppasınıñ azaları vaqtınca işğal etilgen Qırımda hocalıq faaliyetine qarşılıq kösterüv ve Ukrainanıñ nezareti altında bulunğan topraqlarda Qırımdan kelgen Ukraina vatandaşlarınıñ aq-uquqlarına riayet etüv ve olarğa memuriy hızmetlerni berüv boyunca fikir almaştılar.

Oturışta Qırımnı işğalden azat etüv strategiyasına Ukraina Tışqı işler Nazirligi tarafından teklif etilgen Tışqı siyasiy qısımına müsbet qıymet kesildi.