2018 senesi ilk yaz (iyün) 20 künü Ukraina Prezidentiniñ Qırım MC Daimiy Temsilcisi Borıs Babin Yunanistannıñ Odesadaki Baş Konsulı Despini Kokulopulu, Odesada Baş konsulluğınıñ ataşesi Mokas Spiridon ile Temsilclilikniñ ve konsulluqnıñ vekâletleri çerçivesinde bulunğan meselelerni muzakere etmek maqsadınen Temsilcilikte körüşüv keçirdi.

Yunanistannıñ Odesadaki Baş konsulı qayd etti ki, Qırım MC ve Aqyar şeeri Yunanistannıñ Odesadaki konsul bölügine kirgenine baqmadan, Konsullıq Rusiye ile Ukraina arasında devam etken dava sebebinden Qırımda öz vazifelerini tolu şekilde becerip olamay.

Daimiy Temsilci musafirlerni Temsilcilikniñ em vaqtınca işğal etilgen Qırımğa yaqın olğan topraqlarda, em de merkeziy akimiyet organlarınen, cemaat teşkilâtlarınen, halqara teşkilâtlarnıñ ve çetel devletlerniñ vekillerinen işbirlik çerçivesinde maqsatlarınen ve faaliyetiniñ vazifelerinen tanıştırdı.

Borıs Babin Qırımda qanuniy şekilde yaşağan ya da bulunğan yabancı vatandaşlarğa yardım saasında Temsilcilikniñ esas vazifelerini qayd etti ve rusiye işğaliniñ reinelerine çevirilip, al-azırda yarımadada rusiye propaganda maqsatlarında faal işletilgen Qırımnıñ etnik yunan cemiyetiniñ vaziyetine diqqat çekti.

Daimiy Temsilci RF işğalci akimiyet tarafından umumcian abidesi olğan ve işğalden evel UNESCO dünyanıñ medeniy asabalığına kirsetilgen Tavriyalı Hersoneske qarşı yapılğan bozucı areketler aqqında ikâye etti, Keriç köpüriniñ ve ‘‘Tavrida’’ yolunıñ qurucılığı devamında işğalci akimiyet tarafından teşkil etilgen qadimiy arheologik abidelerniñ yoq etilüvi ve hırsızlanuv adiselerini tarif etti. Borıs Babin Temsilcilikniñ Ukrainada uquq qorçalav ve havfsızlıq meselerinen oğraşqan halqara missiyalar ile işbirligi, memleket içinde köçken şahıslar ve vaqtınca işğal etilgen Qırımda yaşamağa devam etken Ukraina vatandaşlarınıñ meselelerini çezüvde yardımlaşması aqqında ikâye etti. Qırımda yaşağan Ukraina vatandaşlarına pasport resmiyleştirüv meselesini qolaylaştırmaq maqsadınen Qırım ile memuriy sıñırına yaqın olğan rayonlarda memuriy hızmet merkezleriniñ ağını teşkil etüvde Temsilcilikniñ rölü muzakere etildi, bu cümleden, keçenlerde Herson şeerinde ‘‘Dokument’’ Devlet müessisesiniñ yañı ofisi açılğanı aqqında haber etildi.

Musafirlerni işğal etilgen topraqlar ile memuriy sıñırında KÇNN-nıñ faaliyetinen, sıñırdan er kün keçken adamlarnıñ miqdarınen, teşkerüv-keçüv tedbirler devamında vatandaşlar içün telükesiz şaraitler yaratmaq içün keçit noqtalarnı minimal şekilde abadanlaştırmaq içün gumanitar ihtiyaçlar ile tanıştırdılar. Körüşüvniñ soñunda musafirler Qırımdaki vaziyet tafsilâtlı şekilde tarif etilgeni içün öz minnetdarlığını bildirip, kelecekte işbirlik aqqında añlaştılar.