Ukrayina prezidentiniñ 2026 senesi fevral 24-de qabul etilgen №161/2026 fermanı ile amelge keçken Ukrayina milliy havfsızlıq ve mudafaa şurasınıñ qararına binaen, Qırımnıñ medeniy mirasınıñ qanunsız sürgün etilmesine ve yoq etilmesine alâqası olğan eki şahıs sanktsiyalar cedveline kirsetildi. Olarğa dair tekliflerniñ bir qısmı Ukrayina Prezidentiniñ Qırım Muhtar Cumhuriyetindeki Temsilciligi tarafından azırlandı.

Hususan, sanktsiyalar aşağıdakilerge qarşı qullanıldı:

Vladimir Aristarhov – D.S. Lihaçev adına Rusiye medeniy ve tabiiy miras ilmiy-tedqiqat institutınıñ müdiri, rf medeniyet naziriniñ sabıq “birinci muavini”. O, Qırımda qanunsız arheologik işlerniñ keçirilmesine izin berdi ve Ukrayina medeniy miras obyektleriniñ yoq etilmesi ve hırsızlanmasınen bağlı leyhalarğa qol tuttı.

Vadim Martinyuk – işğal akimiyeti tarafından qanunsız şekilde qurulğan “Bağçasaray tarihiy-medeniy ve arheologik müzey-qoruğınıñ” sözde baş müdiri. Öz faaliyeti çerçivesinde o, medeniy miras saasında işğalci siyasetniñ amelge keçirilmesine, qanunsız qazmalarnıñ teşkil etilmesine ve müzey fondları ve qıymetleriniñ vaqtınca işğal etilgen Qırımdan avuştırılmasına yardım ete.

Er bir sanktsiya qararı devlet organları tarafından alıp barılğan umumiy işiniñ neticesidir. Bu esnasqa qoşulğan bütün müessiselerge teşekkürler bildiremiz.

Temsilcilik halqara ortaqlarnı sanktsiyalar siyaseti saasında Ukrayina teşebbüslerine qol tutmağa ve işğalci memuriyetlerniñ cinaiy faaliyetine alâqası olğan şahıslarğa nisbeten aynı sıñırlavlarnı kirsetmege çağıra.

Qırımnıñ medeniy mirasını qorçalav ve qabaatlılarnı mesüliyetke çeküv bizim prioritetlerimizden biri olıp qala.