Mayısnıñ 19-nda Kıyiv milliy tehnologiya ve dizayn universitetinde qırımtatar halqı genotsidi qurbanlarınıñ añma kününe bağışlanğan merasim olıp keçti.

Tedbirde Daimiy Temsilciiniñ muavini Denis Çıstikov, universitet rektorı vazifelesini vaqtınca icra etken Talât Belâlov, Qırımtatar Milliy Meclisiniñ reisi Refat Çubarov, Ukrayina Yuqarı Radasınıñ insan aqları vekâletli temsilcisi Oleksandr Osipov ve tarihçı Gülnara Abdullayeva iştirak ettiler.

Tedbir iştirakçileri 1944 senesiniñ sürgünligi, qırımtatar halqınıñ genotsidi, onıñ devamlı aqibetleri aqqında söz yürsetip, rusiyeniñ Qırımnıñ vaqtınca işğali şaraitlerinde qırımtatarlarğa qarşı yapqan repressiyalarına diqqat ayırdılar.

Öz çıqışında Denıs Çıstikov, qırımtatarlar öz toprağından sürgün etilgenini ve böyle areketlerniñ maqsadı olarnıñ kimligini yoq etüv olğanını qayd etti. Onıñ aytqanına köre, rusiye bu siyasetni bugün de devam etmekte: vaqtınca işğal etilgen Qırımda taqipler devam ete, qırımtatar halqınıñ yüzlernen temsilcisi ise siyasiy sebepli repressiyalarnıñ qurbanı ola. O, vaqtınca işğal etilgen yarımadada yaşağan Ukrayina vatandaşlarınen daimiy kommunikatsiyanıñ müimligini qayd etti.

”Hatırlamaq – yalıñız keçmiş aqqında degil. İşğal etilgen Qırımda qalğan insanlarnı qorçalamaq ve olarnıñ Ukrayina ile bağını saqlamaq bizim mesüliyetimizdir”, – dep qayd etti Denıs Çıstikov.

”Cezasız qalğan yamanlıq er vaqıt deşetli şekillerge çevirile, şunıñ içün biz işğalcilerge qarşılıq köstermek kerekmiz”, – dep qoştı Qırımtatar Milliy Meclisiniñ reisi Refat Çubarov.

O, imperiya rejimleriniñ toponimlerniñ deñiştirilüvi, mezarlıqlarnıñ ve medeniy mirasnıñ yoq etilüvi vastasınen qırımtatarlarnıñ bulunuv izlerini yoq etmege tırışqanlarını hatırlattı.

Böyle tedbirler tarihiy hatıralarnıñ saqlanmasınıñ müim qısmıdır ve adaletni tiklev, Ukrayina tamır halqınıñ aqlarını qorçalav ve Qırım yarımadasınıñ işğalden azat etilmesiniñ zarurlığını hatırlata.