Daimiy Temsilciniñ muavini Denis Çıstikov Ukrainanıñ ayrı topraqları, şu cümleden Qırım Muhtar Cumhuriyeti ve Aqyar şeeriniñ vaqtınca işğal etilmesiniñ uquqiy neticeleri boyunca formal olmağan Ukraina-AB mesleatlaşuvlarınıñ 12-nci turında iştirak etti.
Mesleatlaşuvlarda Ukraina devlet organlarınıñ, şu cümleden Tışqı işler nazirliginiñ, Medeniyet ve strategik kommunikatsiyalar nazirliginiñ, Tasil ve ilim nazirliginiñ, İçtimaiy siyaset nazirliginiñ, Energetika nazirliginiñ, Baş prokuraturanıñ, Ukraina Yuqarı Radasınıñ insan aqları boyunca vekili ofisiniñ, Qırım Muhtar Cumhuriyeti ve Aqyar şeeriniñ Prokuraturası, Ukraina Telükesizlik Hızmetiniñ, Mudafaa Nazirliginiñ Baş istihbarat idaresiniñ, Ukraina Silâlı Quvetleriniñ Arbiy-Deñiz Quvetleriniñ temsilcileri iştirak ettiler. Avropa Birligi tarafından körüşüvge Avropa tışqı faaliyet hızmetiniñ (EEAS) ve Avropa Komissiyasınıñ Maliy stabillik, maliiy hızmetler ve sermaye bazarları birligi boyunca Baş direktoratınıñ (DG FISMA) vekilleri qoşuldı.
Daimiy Temsilciniñ muavini Denıs Çıstikov munaqaşalar vaqtında vaqtınca işğal etilgen yarımadanıñ sakinleri qarşılaşqan esas meseleler aqqında aytıp berdi. O, işğalge qarşı çıqqan ve Ukrainağa qol tutqan yerli halqnıñ sistemalı repressiyalarğa oğratılmasını ve taqip etilmesini ayrıca qayd etti.
Siyasiy mabüslerge işkence yapılmasına ve tibbiy yardım kösterilmememsine, em de Qırımda yaşayışnıñ, hususan, tasil saasınıñ askeriyleştirüvine ayrıca diqqat ayırıldı. Arbiy teşviqat ve balalarnı arbiy qurulışlarda oqutuvğa celp etüv yaşlar arasında rusiye tarafdarlığı ve kimligini şekillendire, bu ise bala aqlarını qorçalav aqqında halqara standartlarını boza.
Bundan da ğayrı, Daimiy Temsilciniñ muavini işğal etilgen topraqlarda tasil ve balalıqnıñ sistemalı askeriyleştirüvine de diqqat çekti. “Cesürlik dersleri”, “Yunarmiya” ve “Birinciler areketi” ve kadet sınıflarınıñ faaliyeti vastasınen balalar arbiy teşviqatqa celp etile, rusiye taraflı kimlik şekillendireler ve işğalci devletniñ ordusında hızmetke azırlanalar, bu ise halqara gumanitar uquq ve bala aqlarınıñ ciddiy bozulmasıdır.
Çıqışınıñ soñunda Denis Çıstikov Avropa Birligine yardımları içün teşekkür bildirip, Qırımnıñ işğal etilmesini tanımama siyasetini devam etmege, repressiyalarğa soñ qoyulması, siyasiy mabüslerniñ azat etilmesi, Ukrainanıñ vaqtınca işğal etilgen topraqlarında insan aqlarına riayet etilmesini temin etmek içün rusiyege qarşı basqını arttırmağa çağırdı.
AB delegatsiyasınıñ azaları Qırımda rusiye idaresini tanımama siyaseti deñişmecegini tasdiqlap, işğal etilgen Qırımda insan aqları qorçalanması kerekligini qayd ettiler ve rusiye tecavuzına qarşı küreşte Ukrainağa ileride de yardım eteceklerini, şu cümleden sanktsiyalar basımı, siyasiy daymalıq ve gumanitar yardım eteceklerini bildirdiler.