Yanvarniñ 15-nde Daimiy Temsilciniñ muavini Denis Çıstikov Qırımtatar resurs merkezi tarafından teşkil etilgen “Ukrayina tamır halqları aqqında” Ukrayina qanunınıñ yerine ketirilmesi meselesi” adlı tögerek masasına qoşuldı. Tedbirde aynı vaqıtta qırımtatar resurs merkeziniñ yolbaşçısı Eskender Bariyev, Milliy Meclis reisi Refat Çubarov ile etnosiyaset ve vicdan serbestligi boyunca devlet hızmetiniñ başı Viktor Yelenskiy ve onıñ muavini İgor Losovskiy iştirak ettiler.
Tedbir devamında iştirakçiler “Ukrayinanıñ tamır halqları aqqında” Ukrayina Qanunınıñ ömürge keçirilmesi statusı ve bu Qanunnen közde tutulğan tabiy normativ-uquqiy aktlarnı işlep çıquv ceryanı aqqında muzakereler keçirdiler. Bu. qanun azırlanuvına Temsilcilik de qoşulğan edi.
Öz çıqışında Denis Çıstikov, Temsilcilik Ukrayina tamır halqlarınıñ vekillerinen ve qırımtatar halqınıñ Meclisinen sistematik sürette işbirlikte bulunğanını qayd etti. Denıs Çıstikov Qanunnı ömürge keçirüvde devlet akimiyet organlarını daa keniş celp etmek kerekligine ayrıca diqqat ayırdı, çünki çezilmesi kerek olğan meseleler çeşit saalarnı qaplap ala, keyfiyetli normativ-uquqiy aktlarnı azırlav ise bütün iştirakçilerniñ faal iştirakini talap ete. Aynı vaqıtta o, Temsilcilik ayrıca vaqtınca işğal etilgen topraqlarnıñ olması ve anda Ukrayina tamır halqlarınıñ yaşaması köntekstini devletniñ Avropa integratsiyası faaliyeti ceryanına kirsetmege tırışqanını da bildirdi.
Daimiy Temsilciniñ muavini, aynı vaqıtta, Temsilcilikniñ Ukrayina tamır halqlarınıñ aqlarını qorçalavda izçen siyasetini qayd etip, qurulışlar arasında tesirleşüvniñ, tamır halqlarnıñ temsil organlarınen açıq dialognıñ ve olarnıñ aqları ile serbestliklerini ömürge keçirmek içün ilerideki normativ saasınıñ quvetleştirilmesiniñ emiyetini ifade etti.
2021 senesi qabul etilgen “Ukrayinanıñ tamır halqları aqqında” Ukraina Qanunı halqara standartlarğa, hususan BMT-niñ tamır halqlarnıñ aqları aqqında beyannamesine köre tamır halqlarnıñ aqlarını teminlemek ve qorçalamaq içün devlet siyasetini şekillendirüvde müim adım oldı.