Fevralniñ 17-nde Daimiy Temsilciniñ muavini Denıs Çıstikov Qırımda rus tecavuzınıñ evelki şartlarına ve yarımadada işğalden evel olğan ceryanlar ve faktorlarnıñ taliline bağışlanğan “CrimeaVox: İşğal cinayetleri” adlı vesiqalı leyhanıñ prezentatsiyasında iştirak etti.

Kıyiv-Mohila akademiyası milliy universitetiniñ prezidenti Sergiy Kvit, Büyük Britaniya meselelerinden muvaqqat vekili Şarlotta Süren, Milliy Meclis reisi Refat Çubarov tedbirde açılış sözlerinen çıqışta bulundılar. Ayrı çıqışnı yaqında işğal etilgen yarımadanı terk etken qırımlı Polina da yaptı.

Öz çıqışı vaqtında Denis Çistikov, uzun müddetli işğalge ve rus teşviqatınıñ añlatuvlarına baqmadan, Qırım yarımadası sakinleriniñ qarşılıq kösterüvleri devam etkenlerini qayd etti. Daimiy Temsilciniñ muavini ayrıca “CrimeaVox: İşğal cinayetleri” leyhası işğal aqqında aqiqatnı saqlamağa yardım etkenini ve rusiye tarafından Qırımda yapılğan cinayetler aqqında aqiqatnı aydınlatmağa yardım etkenini bildirdi.

“rusiye federatsiyası Qırım tarihını yañıdan yazmaq, ukrayin ve qırımtatar özgünligini yoq etmek içün millionlarnen ruble sarf ete. Bu film kerçeklikni qaytara ve işğal mehanizmlerini tasvir ete.”

Öz nevbetinde Refat Çubarov, 2014 senesi olğan vaqialar memleketniñ saqlanıp qalması içün izçen devlet siyasetiniñ ve çağıruvlar ile telükelerge vaqtında diqqat ayıruvnıñ ne qadar müim olğanını köstergenini qayd etti. O, bu vaqialarnı filmler vastasınen incelevniñ emiyetini de ifade etti, çünki kelecekte böyle vaqialarnıñ ögüne keçmek içün cemiyet olardan ders almaq kerek.

Şarlotta Suren Büyük Britaniyanıñ Ukrayinağa destek köstermege devam etecegini aytıp, Qırım yarımadasınıñ işğali aqqında film halqara cemiyet içün müim olğanını qayd etti, çünki o, vaqialarnıñ hatırasını ve serbestlik oğrunda küreşni devam etken insanlarnıñ seslerini saqlay. Surenniñ aytqanına köre, qırımlılarnıñ ikâyeleri ve Jamalarnıñ “1944” yırı kibi medeniy ikâyeler qırımtatar halqınıñ faciasını ve cesaret küçüni dünyağa daa yahşı añlamağa yardım eteler.

“Bugün biz seyir etken film insan cesaretiniñ, yeñilmezlikniñ ve serbestlikke ıntıluvınıñ şaatlığıdır. Bular iman ve aynı vaqıtta quvet aqqında ikâye etken insanlarnıñ sesleridir. Qırım – Ukrayinadır.”

Tedbir vaqtında Temsilcilik, “PEN Ukrayina” cemaat teşkilâtı ve ZMİNA insan aqqları merkezi tarafından 2023 senesi başlatılğan uquq qorçalav teşebbüsi de taqdim etildi. Bundan ğayrı, tedbir iştirakçileri ana-babaları rusiyeniñ apishanelerinde bulunğan balalarğa bağışlanğan “İşğalde ösmek” fotosergisini de ziyaret etip oldılar.