Bugünden başlap, RF-te ve şu cümleden vaqtınca işğal etilgen Qırım Muhtar Cumhuriyeti ve Aqyar şeerinde arbiy hızmetke celp etüv maqsadınen 19 qanunsız seferberlik kampaniyası devam etecek. 

2015 senesinden başlap vaqtınca işğal etilgen Qırımda 18 qanunsız seferberlik kampaniyası ötkerildi, bu kampaniyalar çerçivesinde işğalci devletniñ silâlı quvetlerine umumen 44,5 biñ asker çağırtıldı. 

Yarımada sakinleri, Ukraina vatandaşları nevbetteki kere qanunsız seferberlikten qaçınmağa tırışsa da, işğalci memuriyetler cinaiy taqipler vastasınen olarnı mecbur etecek ola. Şimdilik 520 adise aqqında belli, olar arasında 206 adise, yani 40% 24.02.2024-ten soñra qayd etildi. 

İşğalci devlet temsilcileriniñ böyle areketleri arbiy cinayet olğanını qayd etip, işğalci topraqlarda yaşağanlarnı işğalci silâlı quvetler terkibine çağıruv, Qırımda rus ordusunda hızmet propagandasınıñ keçirilmesi, Ukraina vatandaşlarını işğal etilgen topraqlardan RF topraqlarına köçüriv cenk vaqtında grajdan ealiniñ aq-uquqları Konventsiyasınıñ maddelerini bozğanını hatırlatamız.  

Qırımda Rusiye Federatsiyasınıñ qanunsız seferberlik kampaniyasını ve seferberlikten qaçınma içün vatandaşlarımıznıñ cinaiy taqiplerini halqara toplulıqlar da tenqit ete, hususan  “Qırım Muhtar Cumhuriyeti ve Aqyar şeerinde insan aqqları saasında vaziyet” adlı 18 dekabr 2019 ve 16 dekabr 2020-de Birleşken Milletlerniñ Baş Assambleyası tarafından çıqarılğan beyannameler bunu aks etmektedir. 

İşğalci devletniñ silâlı quvetlerinde arbiy hızmetke mecbur etilgen Ukraina vatandalarına muracaat etip, böyle vaqialar aqqında bildirmelerini rica etemiz. Toplanılğan isbatlar Qırımdaki qanunsız seferberlikni qayd etüv ve qabaatlılarnı mesuliyetke çeküvge, bundan da ğayrı arbiy cinayetlerden zarar körgen vatandaşlarımıznı qorçalamağa yardım etecektir.