Olga Kurışko 2025 senesi yanvar ayında Ukrayina Prezidenti Volodımır Zelenskıy tarafından Ukrayina Prezidentiniñ Qırım Muhtar Cumhuriyetindeki Daimiy Temsilcisi vazifesine tayin etildi (evelki vazifesi – 2024 senesi dekabrniñ 5-nden başlap Daimiy Temsilci vazifesini vaqtınca icra etken, ondan evel – 01 iyül 2023 s. Daimiy Temsilci muavini).
Olga Kurışko – uquqşınas, Yaroslav Mudrıy adına Ukrayina milliy uquq akademiyasınıñ mezunı. O, hususiy, devlet ve cemaat sektorlarında çalıştı, memleket içinde yaşağan yerini deñiştirgenlerge uquqiy yardım kösterdi, uquqiy vesiqalar azırladı ve advokatsiya teşebbüslerinen oğraştı. 2015–2016 seneleri “Mecbur köçkenlerge resurs yardım merkezi“ cemaat teşkilâtları ittifaqında, soñra ise “Serbest insanlar evi“ leyhasında çalıştı. 2016 senesinden 2021 senesine qadar advokatsiya mutehassısı ve “KrımSOS“ cemaat teşkilâtınıñ idare reisiniñ muavini oldı.
2021 senesi dekabr ayında Olga hanım Temsilcilik taqımına qoşuldı ve uquqiy yardım bölüginiñ başına keçti. O, vaqtınca işğal etilgen yarımadağa ve onıñ sakinlerine ait normativ-uquqiy aktlarnıñ işlep çıqarılmasında faal iştirak etti, hususan “Qırım“ serbest iqtisadiy zonası“nıñ lâğu etilmesi ve işğal etilgen topraqlarda iqtisadiy faaliyetni alıp baruv hususiyetleri aqqında qanun, qırımtaqtar halqınıñ statusı aqqında qanun leyhası, vaqtınca işğal etilgen topraqlarda ya da çetelde olğan vatandaşlıq statusı aktlarınıñ sadeleştirilgen tertipte devlet qaydiyeti aqqında qanun leyhası, Herson ve Donetsk vilâyetleri arasında memuriy sıñırnı keçüv tertibini sadeleştirüv aqqında qararlar, vaqtınca işğal etilgen topraqlarda ya da çetelde olğan vatandaşlıq statusı aktlarınıñ devlet qaydiyeti tertibi aqqında qanun leyhası.
Olga Kurışko Temsilcilikte çalışmağa başlamadan evel, Qırım Muhtar Cumhuriyetiniñ ve Aqyar şeeriniñ vaqtınca işğal etilgen topraqlarınıñ azat etilmesi ve reintegratsiyası strategiyasını işlep çıqaruvda iştirak etti, şimdiki vaqıtta ise yarımadanıñ azat etilmesinden soñ devlet tarafından yapılacaq esas adımlarnı işlep çıqarğan Temsilcilik yanındaki iş gruppasınıñ azası ola.
Olga Kurışko ayrıca, işğalci devlet tarafından terrorcılıqqa para teminlev ve ırq diskriminatsiyası şekilleriniñ yoq etilmesi aqqında eki beyannameni bozuv aqqında “Ukrayina Rusiyege qarşı!“ davasında ekspert olaraq ukrayin uquqçılar taqımına qoşulğan edi.