2018 senesi berim ayı (sentâbr) 4 künü Temsilcilik Ukraina Prezidenti yanında devlet idaresi boyunca Milliy akademiya ile beraber ‘‘Qırımdan rusiye istilâsına qarşılıq kösterüv boyunca acele tedbirlerniñ siyasiy, uquqiy, iqtisadiy, idariy ve içtimaiy tarafları’’ mevzusında ilmiy-ameliy konferentsiyanı keçirdi. Tedbirde alimler, yigirmiden ziyade oquv yurtlarnıñ, ilmiy müessiselerniñ ve devlet idareleriniñ yolbaşçıları ve mütehassısları iştirak etti.
Tedbirni açqan Milliy akademiyanıñ professorı Vasıl Kuybida Ukrainanıñ vaqtınca işğal etilgen Qırım toprağından rusiye istilâsınıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planına yüksek qıymet kesip, yarımadanı işğalden azat etüv boyunca Ukraina Prezidenti seviyesinde umumdevlet strategiyanı inkişaf ve qabul etmege kerek olğanını qayd etti.
Borıs Babin Temsilcilik tarafından acele tedbirler Planınıñ amelge keçirilgen maddelerini tarif etti ve Qırımnıñ işğalden azat etilüvi ve ğayrıdan integratsiyası boyunca strategiyanıñ merkeziy akimiyet organları öz vekâletleri çerçivesinde inkişaf etken parçalarını bir umumiy vesiqağa çevirmege kerek olğanını qayd etti. Daimiy Temsilci Qırımdan rusiye istilâsına qarşılıq kösterüvniñ ve kelecekte yarımadanı işğalden azat etüvniñ strategik, program ve plan ölçevleriniñ qanun yaratıcılıq faaliyetindeki hususiyetlerini tarif etti ve deral çezilüvni talap etken pıtraqlı meselelerni seslendirdi. Vernadskiy adına Tavriya Milliy Universitetiniñ rektorı Volodımır Kazarin vaqtınca işğal etilgen topraqlarda yaşağan gençlerniñ tasil aqlarınıñ qorçalavı, Qırım aliy oquv yurtlarınа tekrar tasil ruhsetleri berilüvniñ mumligi aqqında ikâye etti. Vaqtınca işğal etilgen topraqlarda yaşağan vatandaşlarnıñ aqlarını qorçalavı meselesini adliye ilimler doktorı Anatoliy Kostruba köterdi.
Milliy Polis Yolbaşçısı Birinci muavininiñ yardımcısı Yuliya Zamoroka Ukraina Milliy Polisiniñ vaqtınca işğal etilgen topraqlarda mahsus uquqiy tertipni temin etüv esnasındaki vazifelerini tarif etti, statistik malümatlarnı taqdim etti. Professor Nataliya Kaminska Ukrainanıñ vaqtınca işğal etilgen topraqlarnı işğalden azat etüv ve ğayrıdan integratsiyası boyunca kompleks mehanizm meselesini köterdi. Professor Vasıl Gorbaçuk Ukrainanıñ ve qomşu devletlerniñ arbiy indekslerniñ soñki otuz yıl devamında inkişafinı talil etti, bunıñ sebeplerini ve neticelerini taqdim etti. Başqa meselelernen beraber qırımtatar halqınıñ genotsidı ve sürgünligi meselelerini talil etken dotsent Oleksiy Plotnikov qırımtatar halqı içün keçici devirniñ adliyesi aqqında malümat berdi.
Dotsent Anton Korınevıç rusiye istilâsı ve Qırımnıñ işğal etilüvi şaraitlerinde halqara uquqnıñ esaslarını ve menbalarnı tarif etti, Roma nizamnamesini qabul etmege ve Ukraina Cinaiy Kodeksini halqara gumanitar uquqnıñ şartlarına uyğunlıqqa ketirüvniñ muimligini qayd etti. Ukraina içtimaiy siyaset Nazirliginden ekspert gruppasınıñ yolbaşçısı Olesâ Tsıbulko qırımlılarnıñ içtimaiy teminlevi, bala doğğanda madiy yardım ve pensiyalar aqqında ikâye etti. Psihologiya ilimler namzeti İllâ Yagiyayev Qırımnıñ ilhaqı sebebinden Ukrainağa telüke teşkil etken kimlik saasında rusiye istilâsı boyunca maruzası ile çıqışta bulundı. Dotsent Vyaçeslav Şved Ukrainanıñ mustaqilligine ve topraq bütünligine halqara qoltutuv boyunca maruzalarnıñ esas maddelerine yekün çekti ve kelecekte işbirlikte bulunmağa teklif etti.
Konferentsiyanıñ neticesi olaraq, tevsiyeler diqqatqa alınıp, metinler cıyıntığı neşir etilecektir.