Mayısnıñ 21-nde M.M. Ğrışko adına Milliy botanika bağçasında Ukrayinanıñ milliy azlıqları ve tamır halqlarınıñ Bütünukrayin forumı olıp keçti. Tedbir devlet akimiyeti organlarınıñ, milliy cemiyetlerniñ, Ukrayina tamır halqlarınıñ, diplomatik korpus ve cemaat sektorınıñ vekillerini birleştirdi. Tedbirniñ teşkilâtçısı – Ukrayinanıñ etnosiyaset ve vicdan serbestligi meselelerinden devlet hızmeti.
Bu yıllıq forum, er bir medeniyet, ananeler ve cemiyetniñ öz tamırları olğan, amma bir arada yekâne bir meydan teşkil etken Ukrayinanıñ umumiy bağçası kibi simvolik kontseptsiyası altında keçti. Tedbir çerçivesinde Ukrayina içün dinlerara dua, terekler oturtma merasimi, em de bir sıra açıq çıqışlar ve milletlerara birlik ile medeniy çeşitlik aqqında munaqaşalar ötkerildi.
Daimiy Temsilciniñ çıqışı esnasında ukrayinlerni serbest devlette yaşama ıntıluvı birleştirgenini qayd etip, mında er kes musaviy olğanını ve öz kimligini saqlama imkânına saip olğanını bildirdi.
”İman ve birlik ukrayin cemiyetine eñ qıyın sınavlardan keçmege yardım ete”, – dep qayd etti Olga Kurışko
Öz nevbetinde Ukrayinanıñ etno-siyaset ve fikir serbestligi boyunca devlet hızmetiniñ başı Viktor Yelenskıy qayd etkenine köre, insanlarnıñ beraber olmaq, bir-birine qol tutmaq ve memleketniñ ğayrıdan tiklenmesi içün beraber çalışma istegi ukrayin siyasiy milletini şekillendire ve bugün Ukrayina içün hususiy qıymet taşıy.
“Halqnı bir millet yapqan şeyler – birlikte olmaq ve memleketni ğayrıdan tikleme ıntıluvları meni ayretlendire. Bu pek qıymetli bir şey”.
Qırımtatar Milliy Meclisiniñ reisi Refat Çubarov, öz toprağına sevgi ve devlet ögünde mesüliyetlilikniñ müimligini qayd etip, bu qıymetler ukrayin cemiyetine memleketini qorçalamağa yardım etkenini qayd etti.
Resmiy qısımdan soñ tedbir konsert programması ve milliy azlıqlar, tamır halqları, arbiyler, yaşlar, göñülliler, sanatçılar ile sportçılarnıñ çıqışlarınen devam etti.
Forum, milletlerara birlik, tamır halqlarnıñ ve milliy azlıqlarnıñ aqqlarını qorçalav meselelerini muzakere etüv, em de ukrayin devletçiliginiñ bir qısmı olaraq medeniy çeşitlilikniñ saqlanması içün bir meydançıq oldı.
