2014 senesi mart ayında Qırımda “Bir Ukrayina içün” şiarınen kütleviy mitingler olıp keçti. Şeerlerde ve qasabalarda adamlar merkeziy meydanlarğa çıqıp ve rus askerleri tarafından qapatılğan ukrayin arbiy bölüklerine kelip, Ukrayinanıñ topraq bütünligine qoltuttılar.

2014 senesi martnıñ 9-nda, Taras Şevçenkonıñ 200-nci doğğan künü münasebetinen keçken mitingler ayrıca kütleviy oldı. İştirakçiler Şevçenkonıñ şiirlerini oqudılar, ukrayin yırlarını yırladılar, milliy bayraqlarnı köterdiler, vatanperverlik şiarlarını seslendirdeiler. İnsanlar Qırım Ukrayina olğanını köstermek içün meydanlarğa çıqqanlarını ve rusiyeniñ işğalini qabul etmegenlerini açıqtan-açıq beyan ettiler.

9-ncı martta keçken kütleviy aktsiyalar iç bir sahte referendum ya da küçlü basqı ukrayin qarşılığını sındırıp olamaycağına daa bir isbat oldı. Şu künü Aqyarda keçken mitingte yüzge yaqın, Aqmescitte ise biñge yaqın adam iştirak etti.

Aynı vaqıtta işğalci “idare” grajdan qarşılığını faal sürette bastırmağa başladı. 9 mart künü Aqyarda keçirilgen miting vaqtında rusiye havfsızlıq küçleri Menlik inqilâbınıñ faali Mıkola Şipturnı tuttılar.

Aqmescitte o künü Taras Şevçenkonıñ abidesi yanında büyük miting olıp keçti. Lâkin onıñ teşkilâtçıları Andriy Şçekun ve Anatoliy Kovalskiy miting yerine yetip olamadılar. Saba olar Aqmescit demiryol vokzalında ukrayin timsalleri ile yollanma almaq içün trenni qarşılağanda tutulıp alındılar.

Repressiyalarğa baqmadan, 2014 senesi bütün mart ayı devamında Qırımnıñ bir çoq şeer ve köylerinde insanlar Ukrayinanıñ topraq bütünligine qoltutıp, soqaqlarğa çıqıp, “canlı zıncırlar”nı teşkil etip, barışıq mitingler keçirdiler. Soñra basqınıñ artması, faallerni qorqutuv ve taqip etüvler sebebinden kütleviy narazılıqlar toqtadı. Lâkin qarşılıq ğayıp olmadı – yer astına keçti.

2014 seneniñ mart ayındaki vaqialar Qırım halqınıñ cesürligi ve boysunmazlığı aqqında müim bir hatırlatma olaraq qalmaqta. Olar qırımlılarnıñ işğalni qabul etmegenlerini ve serbestligi içün küreşni devam ettirgenlerini isbatladılar.