”Terciman” qırımatar tilinde derc etilip, siyasiy, iqtisadiy ve medeniy haberlerni aydınlatqan ilk gazettir. İşu matbuat vastası 1918 senesinece derc etilmege devam etti.

2011 senesi Bahçisaray şeerinde keçirilgen qırımtatar matbuat vastaları konferentsiyasında çiçek ayınıñ 10 künü Qırımtatar jurnalistikası künü olaraq ilân etildi. Qırımtatar tilinde derc etilgen matbuat vastaları haberlerni bildirmekten ğayrı, maarif faaliyetinen oğraşa, til, medeniyet, ananeler, hatıra ve milliy kimlikni qorçalav kibi maqsatqa hızmet eteler.

8 yıl içinde Qırımdaki işğalci akimiyet jurnalistlerniñ aqlarını defalarca bozdı, söz ve matbuat vastaları serbestligi sıñırlanmaqta. Qırımtatar matbuat vastaları tsenzura ve siyasiy basqıdan zarar körse de, Qırımnıñ media saasında qırımtatar tilini qorçalamağa devam etmekteler.

İşğalciler Qırımda propagandist matbuat vastaları yardımınen kerçekni qıyıştırmağa tırışa, yarımadada yüz bergen adiselerniñ kerçek yüzüni köstermey, apis telükesine baqmadan, kerçekni aydınlatqan jurnalistlerge ve qırımtatarlarğa qarşı cezalavlar aqqında haber etmey.

Qırım meseleleriniñ aydınlatuvına cümlemiz ziyade diqqat ayırmalı, tsenzura ile yalancı haberlerge qarşılıq köstermeli ve, elbette, mustaqil qırımtatar jurnalistikasınıñ inkişaf etmesine qol tutmalımız.

Açıq menbalarda bulunğan fotoresim.