2025 senesi iyünniñ 2-nde işğal etilgen Qırımda qırımtatar faali, milliy küreş idmancısı ve molla Vait Muhtarov vefat etti. O, 91 yaşında edi.

Ay-Serez köyünde doğğan Vait Muhtarovnı qorantasınen beraber zorbalıqnen Özbekistanğa sürgün etkenlerinde o daa 9 yaşında edi.

“28 kün içinde 4 kiçik qardaşım ve anam keçindi. Olar içün mezar qazmağa mecbur olğanımda men 12 yaşında edim. Nasıl mezarlar qazıp olurdım ki? Biraz topraqnı qazıp, köme edim. Balalarnen beraber köme edik. Qomşumız bir ozbek qadın bizge asılğan araba berdi, biz oña cesetni yüklep, onı defin etmek içün taşıy edik. O yıllarda çakallar pek çoq edi. Cıyasıñ, soñra çakallar cesetni çıqara. Dayım anam ölgen soñ ertesi kün keldi. Haberlerni eşitip kelgen. ‘Vait, kel, anañ içün dua oquyıq’, dedi o. Kelsek, anamnıñ tek kemikleri qalğan. Çakallar onı mezardan çıqarıp, aşağanlar. Qardalarımnı da öyle. Bu mezarlıqta defin etilgenler qalmadı”, – dep, hatırlay edi Vait ağa.

Cenkten soñ babası onı tapıp, kiçik qardaşı ile beraber Tulağa alıp kete.

Sürgünlik şaraitlerinde Vait tek üç sınıfnı bitirip, tasilini bitiremedi. Amma balalıqtan milliy küreşnen meraqlana edi, soñra idmancı oldı, yaşayışınıñ çoqusı qısmını bu küreşke bağışladı. Onıñ rehberligi altında bir qaç sportçı nesli östi.

1990 senesi Vait ağa Vatanına qaytqan soñ, cemaat yaşayışına qoşula. Ay Serez köyünde koydeşler körüşüvlerini ziyaret etip, dualar keçire. Onıñ ğayretleri sayesinde Aqmescit civarındaki Cañatay köyünde cami quruldı, Vait ağa Qırımğa qaytqan soñ o köyge yerleşken edi ve çoq yıllar devamında anda imam olıp çalıştı.

Vait aga  “Haytarma”  filminiñ bir epizodında da oynağan edi.

Vait Muhtarovnıñ 4 balası, 14 torunı ve torunlarınıñ balları bar.

Allah rahmet eylesin!