2018 senesi oraq ayı (iyül) 13 künü Temsilcilikteki halqara alâqalar hızmetiniñ baş mesleatçısı Taisiya Tkaçenko, Qırım MC ve Aqyar şeerinden mektep mezunlarınıñ em de başqa şahıslarnıñ 2018 senesi Herson vilâyetindeki aliy, mahsus ve zenaat-tehnikiy oquv yurtlarına kiriş meseleleri boyunca operativ ştabınıñ nevbetteki oturışında iştirak etti. Oraq ayı (iyül) 12 künü aliy oquv yurtlarında abituriyentlerniñ arizalarını qabul etüv başlandı, bücet esabına oquvğa qabul etüv oraq ayınıñ 20-nece devam etecek, 27-den başlap ise, kontrakt boyunca qabul etüv başlanacaqtır.

‘‘Qırım-Ukraina’’ tasil leyhasını yerine ketirüv çerçivesinde Ukrainanıñ vaqtınca işğal etilgen Qırım toprağında yaşağan ve nasıldır sebeplerden vesiqalarını bücet esabına oquvğa tapşırıp etiştirmegen vatandaşlarnıñ, abituriyentlerniñ meseleleri aliy oquv yurtlarında oquv içün ayrı kvotalarnı ayıruv yolunen Ukraina tasil ve ilim Nazirligi ile individual şekilde çezilecektir.

Temsilcilikniñ aliy oquv yurtlarınıñ temelinde teşkil etilgen ‘‘Qırım-Ukraina’’ tasil merkezi, Ukraina Devlet migratsiya hızmetiniñ Herson vilâyetinde idaresi, Ukraina Devlet sıñır hızmetiniñ Azaq-Qaradeñiz regional idaresi, Milliy polisniñ Qırım MC ve Aqyar şeeri boyunca Baş idaresi, Ukraina Havfsızlıq Hızmetiniñ Qırım MC-de Baş idaresi ile sıqı işbirlik çerçivesinde aliy oquv yurtlarına qolaylaştırılğan protsedura ile oquvğa kiriş imkânları aqqında Ukrainanıñ vaqtınca işğal etilgen Qırımnıñ sakinlerine haber etüvde Temsilcilikniñ muim rölü qayd etildi.

Ağımdaki sene devamında Temsilcilikniñ qol tutuvı ile Qırımdan abituriyentler içün aliy oquv yurtlarğa kiriş kampaniya aqqında basılı ve körgezmeli haber malzemelerini yaratuv ve yerleştirüv, televizion ve radio vastasınen, İnternet saifelerinde ve içtimaiy ağlarda video reklamnı yayınlav teşkil etildi, Temsilcilik bu cümleden ‘‘Qırım-Ukraina’’ kiriş kampaniyasınıñ yayınlanması boyunca esas milliy telekanallarğa bir qaç kere muracaat etken edi.

Operativ ştabnıñ nevbetteki toplaşuvı oraq ayınıñ soñuna planlaştırıldı.