Arman ayınıñ 13-de Ukraina Prezidenti Volodımır Zelenskıy Ukraina Prezidentiniñ Qırım Muhtar Cumhuriyetindeki Temsilciliginiñ faaliyeti ile bağlı olğan «2019 senesi ekim ayınıñ 17-de imzalanğan 758 sanlı Ukraina Prezidenti Fermanına deñişmeler kirsetüv aqqında» 359/2021 sanlı Fermanını imzaladı (https://bit.ly/2UkPYzF).
Fermanğa binaen, Temslicilikniñ vazifelerine Qırım platforması çerçivesinde amelge keçirilgen tedbir ve leyhalarğa ekspert, konsultativ, haber ve başqa qol tutvnı berüv qoşula, bundan ğayrı, Temsilcilikte Qırım platformasınıñ faaliyeti içün mesüliyetli olacaq ayrı bölük teşkil etile.

Temsilcilik Qırım platformasınıñ içki faaliyeti içün mesüliyetli olacaq, şu cümleden:

– vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüvni maqsat etip qoyğan ayrı tedbirlerni amelge keçirüv;
– vaqtınca işğal etilgen Qırımdaki vaziyetni nezaret etüv ve mütenasip analitik malümatlarnı azırlav;
– Ukraina devlet akimiyeti organları içün teklifler ile qararlarnı azırlav;
– vaqtınca işğal etilgen Qırımda yaşağan Ukraina vatandaşlarınen bağ tutuv;
– (Ukraina çetel işler Nazirliginen beraberlikte) halqara ortaqlarımıznen çalışuv.

Bu, Temsilcilik içün yañı seviye ve Ukraina Prezidentiniñ avalelerini yerine ketirüvde ögge alıp ketken büyük bir adımdır. Prezidentimizge işançı ve qol tutuvı içün minnedarlığımıznı bildiremiz. Bu qararlarnı mütenasip şekilde amelge keçirüv oğrunda çalışacaqmız.