Beş yıl devamında azat etilmeleri talap etilgen 76 vatandaşımız evlerine qayttı. Al-azırda olarnıñ episi telükesiz yerde, Ukrainanıñ nezareti altındaki topraqlarda buluna.

Berim (sentâbr) ayınıñ başında ve bügün olıp keçken deñişüvler cemiyette çoqtan-çoq munaqaşalar doğurdı. Kerçerten de, vatandaşlarımıznıñ azat etilmesi, yaqınları tarafından quçaqlanıp alınması içün tölegen fiyatımız pek yüksektir.

İnsan ayatınıñ qıymeti ve aynı vaqıtta insanlarnı ayatlarından marum etken cinayetçiler içün qaçınmaz ceza devletimiz içün eñ müim şeyler olmalı. Eminmiz ki, Rusiye Federatsiyası agentleri vastasınen Menlik İnqilâbı devamında ya da Qırımda, Donetsk ile Lugansk vilâyetlerinde ve umumen alğanda Ukraina topraqlarında yapqan cinayetleri içün cezalav ille de kerçekleşir. Qabaatlı olğanlar mesüliyetke çekilecektir.

Soñki bir qaç kün devamında işğal etilgen Qırım ve RF topraqlarında bulunğan siyasiy mabuslarnıñ azat etilüvi aqqında sualler berildi. Eminliknen bildiremiz ki, olarnı azat etüv oğrundaki faaliyet devam ete – bügün Ukraina Prezidenti tarafından ilân etilgen birinci adım kerçekleşti, yañı adımlar öz nevbetini bekley. Qırım asıllı siyasiy mabuslar kelecek sefer azat etilecek.

Ukrain ya da qırımtatarı olğan iç bir Ukraina vatandaşı unutılmadı. Er bir vatandaşımız içün alıp barğan küreşimiz devam ete.

Kreml mabuslarını azat etüv işine qoşqan isseñiz içün er biriñizge minnetdarlığımıznı bildiremiz. Umumiy ğayretlerimiznen em olarnıñ episini, em de Qırımnı azat etermiz.

Ukraina Prezidenti ofisiniñ resimleri