Fevralniñ 21-nde qayd etilgen Halqara ana tili kününde, Ukrayinada qırımtatar tilinde sekizinci onlayn diktant ötkerilecek.

Diktantnıñ teşkilâtçısı – “Nefes” cemaat teşebbüsidir. Teşkilâtçılar sekiz yıl devamında bu leyha bir çoq iştirakçi içün ananege çevirilgenini ve büyük destek alğanını qayd ettiler. Bu sene diktantnıñ metinini qırımtatar şairi, terciman ve muarrir Mayye Abdulğaniyeva oquycaq.

Diktant fevralniñ 21-nde Kıyiv vaqtınen aqşam saat 19:00-da başlanacaq ve “Nefes” cemaat teşkilâtınıñ YouTube ve Facebook saifelerinde yayınlanacaq.

Yayından soñ iştirakçilerniñ üç saat devamında – aqşam saat 23:00-ge qadar teşebbüsniñ elektron poçta adresine: [email protected] elyazma metinniñ fotoresimini ya da skan şeklini yollamağa imkânları olacaq.

Diktantnıñ metni fevralniñ 22-nde leyhanıñ içtimaiy ağları saifelerinde derc etilecek. Diktantnı hatasız yazğanlarğa mukâfatları berilecek. Onlayn diktantnıñ neticeleri 2026 senesi mart 21 künü ilân etilecek.