Mayısnıñ 27-si qırımtatar alim-türkşınas, şair, yazıcı ve XX asırnıñ eñ belli qırımtatar ziyalılarından biri Bekir Çoban-zadeniñ 133-ncı doğğan künü qayd etile.

Bekir Çoban-zade 1893 senesi Qarasuvbazar şeerinde (şimdiki Bilogırsk) doğdı. O, Osmanlı İmperiyasında ve Macaristanda tasil alğan, bir çoq tilni bilgen ve türkiy tiller ve edebiyatlarnıñ eñ ileri araştırmacılarından biri olğan. Onıñ ilmiy işleri Qırım tışında da belli edi, alim halqara ilmiy konferentsiyalarda iştirak etken ve aliy oquv yurtlarında ders bergen.

İlim faaliyetinden ğayrı, Bekir Çoban-zade edebiyatnen faal oğraşa edi. Öz şiiriyetinde ve publitsistikasında o, qırımtatar halqınıñ medeniyeti, tili, tarihiy hatırası ve kelecegi ile bağlı meseleler üzerinde çalıştı. O, “Türk tili ve edebiyatınıñ ögretüv metodikası” adlı eki cıltlı kitapnıñ, onğa yaqın ilmiy ve ilmiy-metodik işlerniñ müellifidir. 1927 senesi Çoban-zade yañı türk elifbesiniñ Bütünittifaq komitetiniñ ilmiy şurasına yolbaşçılıq etti.

1937 senesi, Stalin repressiyaları vaqtında sovet akimiyeti Bekir Çoban-zadeni  “milletçilik”  ve  “inqilâbiy faaliyet” aqqında sahte qabaatlavlarnen apiske aldı. Mahkeme Bakuda 20 daqqa devam etti. 1937 senesi oktâbrniñ 13-nde Bekir Çoban-zade qurşunğa tizildi. Onıñnen beraber sovet rejimi qırımtatar ziyalılarınıñ episini yoq etmege tırışqan edi.

Bugün Bekir Çoban-zadeniñ şahsiyeti qırımtatar tarihınıñ ve medeniy mirasınıñ müim bir parçasıdır. Onıñ ayatı ve faaliyeti qırımtatar halqınıñ ilim, medeniyet ve tasil inkişafına büyük isse qoştı, öldürilmesi ise sovet akimiyetiniñ Qırım tamır halqına qarşı repressiyalarınıñ facialı aqibetleri aqqında hatırlata.