1711 senesi yanvarniñ 23-nde Qırım Devleti ve Zaporojjâ Ordusı arasında muqavele imzalandı ve bu muqavele tarihha Kayr muqavelesi olaraq kirdi. Latin tilinde yazılğan vesiqada taraflarnıñ özara dostluq, qardaşlıq ve ortaq arbiy ittifaq esasında devamlı munasebetler qurma niyeti belgilengen edi.

Añlaşma sürgün etilgen Pılıp Orlıkniñ ükümeti tarafından temsil etilgen Getmanlıq ve Qırım hanlığı arasında imzalandı. Başta añlaşma Dniproniñ Kayr keçiti yanında keçirilgen elçiler syezdinde taraflarnıñ vazifedar vekilleri tarafından imzalanğan yeminli vesiqa şeklinde oldı, soñra añlaşmanıñ metni II Han Devlet-Girey tarafından tasdıqlandı.

Mündericesinde añlaşmada Getmanlıq ve Qırım Devleti arasında mudafaa-ücüm ittifaqı belgilendi — taraflar tışqı siyaset areketlerini, şu cümleden Rusiye devletinen muzakerelerdeki pozitsiyalarnı koordinatsiya etüv niyetini ilân ettiler. Bunen beraber Getmanlıq topraqlarınıñ devlet mustaqilligi meselesi añlaşmada yer almadı.

Ayrıca Getmanlıq ealisiniñ öz taqdirini tayin etme aqqı, Qırımnıñ iç işlerine qarışmama printsipi, em de qazaq mülkü ve diniy binalarınıñ toqunmazlığınıñ kefaletleri qayd etildi. Vesiqa Qırım hanlığı mülkünde olğan bölgelerde qazaqlar içün imtiyazlarınıñ saqlanılğanı da tasdıqladı.

Añlaşma şartlarınıñ yerine ketirilmesiniñ kefaleti olaraq Grigoriy Orlık Bağçasarayda qaldı.

1711 senesi Kayr muqavelesi XVIII asırnıñ başında Şarqiy Avropada devletlerara munasebetlerniñ müim nümünesi oldı ve Qırım devleti ile ukrayin qazaqları arasında ittifaqdaş işbirlik istegini köstergen daa bir şaatlıq oldı.