34 yıl evelsi Ukraina tarihınıñ eñ müim vaqialarından biri olıp keçti – 1991 senesi avgustnıñ 24-nde Ukraina mustaqilligini ilân etti. Ukrainanıñ yolunda pek çoq ağır sınavlardan, manialardan keçti, bu Qararname ukrainlerniñ öz devletinde yaşamaq ve onı öz inançlarına köre şekillendirüv aqqı içün uzun küreşiniñ neticesi edi.
1991 senesi dekabrniñ 1-nde keçken bütün umumhalq referendumında ukrainlerniñ 90%-den ziyadesi Ukraina mustaqilligi içün rey berdi. Qırımda bu köstergiç saylavğa kelgenlerniñ 54%-ni, Aqyarda ise 57%-ni teşkil etti. Parlamentniñ qararı halqnıñ doğrudan-doğru iradesine esaslandı.
Qırımda endi 11 yıl devamında Ukraina vatandaşları Mustaqillik kününi rus işğali şaraitinde qayd eteler. Daimiy şekilde basqı, taqip, tevqif etüv, tintüvler, işkenceler – bu Qırımda yaşağan ukrain vatandaşlarınıñ çoqusı içün yaşayış aqiqatlarıdır. İşğalciler iradeni bastırmağa ve faal vatandaşlıq pozitsiyasına saip olğanlarnı taqip etüv, apiske atuv, repressiya ve işkenceler yolunen qorquzmağa tırışalar. Er şeyge baqmadan, Ukraina vatandaşları devletine sadıq qalalar ve cesaretnen qarşılıq köstereler. Yüzlernen insanlar, şu cümleden qırımtatar halqınıñ vekilleri öz aq-uquqlarını, medeniyetini, milliy menligini qorçalamağa devam eteler. Avgust 18 künü berilgen malümatqa köre, 221 insan rus esirliginde buluna, olardan 133 kişi – qırımtatarları.
Ukrainanıñ mustaqillik künü – umumiy maqsatlarğa irişüvde ukrain cemiyetiniñ birleşmesi kerekligini hatırlatuvdır. Vaqtınca bölünüvlerge baqmadan, birlik, milliy degerliklerge sadıqlıq ve serbest memlekette yaşama istegi bizni birleştire.
Bu yılki Mustaqillik künü topraqlarımıznı qorçalağan ve ukrain menligini qorçalağan on biñlernen askerlerniñ sayesinde qayd etile. Bugün Mustaqillik meydanında yüzlernen mavı-sarı bayraqlar dalğalana. Olar er kün mustaqil memlekette yaşamaq aqqı ne qadar yüksek fiyatqa qazanılğanını hatırlatalar. Ukrainler içün “Mustaqillik” sözü çoqtan tantanalıqtan çıqıp, ğayıplar sözüniñ, şu cümleden ev, ömür, kelecek arzular, kelecekte amanlıq ya da işanç duyğusını ğayıp etüvniñ sinonimi oldı. Amma acılar ve küreş vastasınen – millet quvetlene, nesil öse, devletçiligimiz qurula.
Aynı zamanda, soqaq ve meydanlarda yañğırağan tilimizde, kitap tükânları raflarında bizim müelliflerimizniñ kitaplarında, cesür jurnalistikada, ilim ve medeniyetniñ inkişafında bu Mustaqillik yaşay. O, er kün saba doquzda ağrı, ürmet, hatırlavlarnen tolu bir sukünet daqqasında aks oluna.
Mustaqillik Künü hayırlı olsun!