2018 senesi qural ay (mayıs) 10 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikte halqara alâqalar hızmetiniñ reisi vazifesini vaqtınca becergen Taisiya Tkaçenko Ukrainada AHIT Mahsus nezaret missiyasındaki Herson gruppasınıñ vekilleri ile iş körüşüvi çerçivesinde Ukrainanıñ vaqtınca işğal etilgen Qırım topraqlarında işğalci akimiyetniñ qanunsız areketlerini qayd etüv, olarğa lâyıq qıymet kesüv ve Qırımnıñ sıñırına yaqın olıp, Ukrainanıñ kontroli altında bulunğan topraqlarda bu vaziyetniñ neticesi olğan menfiy ceryanlar kibi meselelerni muzakere ettiler.

İşğalci devletniñ silâlı küçleri Qara deñiz, Kerç boğazı ve Sivaş körfezi ile beraber Azaq deñizi suvlarında qanunsız areketleri sebebinden işğalci akimiyet içki suvlar, territorial deñiz ve Ukrainanıñ deñiz iqtisadiy zonası boyunca kene de halqara uquq qaidelerini bozğanına diqqat etildi. 2018 senesi qural ay 4 künü ЯМК-0041  balıqçı gemisi Ukraina vatandaşlarından ibaret olğan taqımınen beraber Rusiye Federal havfsızlıq hızmeti Sıñır hızmetiniñ ‘‘Ametist’’ gemisi tarafından yaqalanğanı ayırca qayd etildi.

Rusiye akimiyet organlarınıñ bu aqta resmiy beyanatları yalancı olğanına ve rusiye cellâtlarınıñ qanunsızlıq ve tertipsizlik toprağına çevirilgen Qırımda işğalciler tarafından yaqalanğan ukrain vatandaşlarnıñ ayatlarına ve sağlıqlarına zarar ketirilmeyecegine dair bir türlü uquqiy garantiyalar olmağanına diqqat etildi. Yuqarında qayd etilgen deñiz suvlarında balıqçılıq nezareti saasında Ukraina qanuniy organlarnıñ ve RF qanunsız strukturalarnıñ areketlerinde büyük farq olğanı, misal olaraq, ukrain akimiyeti halqara uquqnıñ şartlarına ve insan aqlarına riayet etkeni, istilâcı devletniñ cezalav organları ve silâlı quvetleri ise bu qaidelerini açıq-aydın bozğanları qayd etidldi.

Bundan da ğayrı, AHIT MNM vekillerini Ukrainanıñ vatınca işğal etilgen Qırım topraqlarınıñ sıñırında olğan rayonlarda Memuriy hızmet merkezkezlerniñ açıluvı meselesi ve qırımlılarğa berilgen pasport hızmetiniñ keyfiyeti meraqlandırdı. Çağına yetmegen balalarğa ve Ukrainanıñ kontroli altında bulunğan topraqlarda cezalanıp mahküm etlgen qırımlılarğa mütenasip memuriy hızmetlerniñ berilüvine ayrıca diqqat etildi. Qırımlılarğa pensiyalarını tölev, bank hızmetlerine irişim kibi meseleler de muzakere etildi. 2018 senesi ‘‘Qırım-Ukraina’’ kiriş kampaniyasınen bağlı meseleler, Qırımğa yaqın olğan regionlarnıñ aliy oquv yurtlarına Qırımdan abituriyentlerniñ imtiyazlı şartlarda kirmesi içün devlet seviyesinde yapılğan tedbirler de diqqatnen qonuşıldı.

Körüşüvge yekün çekerken, Ukrainada AHIT MNM Herson grupassınıñ yolbaşçısı Piter Çilvers Temsilcilik soñki yarım yıl içinde pek semereli çalışqanını qayd etti ve işbirlik içün teşekkürini bildirdi.