2018 senesi yanvar 31 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin AHIT Ukrainada Mahsus közetüv taqımınıñ vekilleri ile iş körüşüvini keçirdi.

Körüşüv devamında vaqtınca işğal etilgen topraqlarda yaşağan, ya da memleket içinde mecburen köçken vatandaşlarnıñ aq-uquqlarını, serbestliklerini ve qanuniy menfaatlarını temin etüvinen bağlı bir sıra meseleler, bu cümleden, memuriy sıñırda ve etrafındaki mesken yerlerde milliy politsiyanıñ bölükleri tarafından hafsızlıqnı ve içtimaiy tertipni temin etüv, kiriş-çıqış noqtalarında nezaretten keçüvinde qıyınlaqlar muzakere etildi. Bu ceryannı qolaylaştırğan biometrik nezaretniñ imtiyazları qayd etildi.

Körüşüv devamında Boris Babin toplaşuvda bulunğanlarğa Ukraina vatandaşlarına pasport resmiyleştirüvinen bağlı hızmetlerniñ tolu cedvelini berecek Memuriy hızmet merkezleriniñ Qırım MC civarlarındaki rayonlarda teşkil etilüvi, memurlar içün Herson vilâyetinde, yani Geniçesk ve Çaplınka rayonlarında, Herson ve Kahovka şeerlerinde yañı iş yerleriniñ açıluvı aqqında haber etti.

Bundan ğayrı, Daimiy Temsilci eyetke Temsilcilikniñ kündelik faaliyeti, siyasiy mabüslerniñ ailelerine gumanitar ve tıbbiy yardımnıñ berilüvi, vesiqalarnıñ resmiyleştirüvinde yardım, ilk uquqiy yardımnıñ berilüvi aqqında ikâye etti. Qırımtatar halqı Milliy Meclisisiniñ işğalci akimiyet tarafından yasaq etilmesi şaraitlerinde Ukraina vatandaşlarınıñ aq-uquqlarınıñ bozuluvına ayrıca diqqat ayırıldı.

Körüşüv devamında memleket içinde mecburen köçken, ya da Qırımdan kelip ketken Ukraina vatandaşlarına tıbbiy yardımnı berüv ve onıñ husiyetleri, vatandaşlıq vaziyetini resmiyleştirüv, arbiy hızmetni keçüv kibi meseleler baqıldı.

Körüşüvniñ neticesi olaraq, taraflar işğalci akimiyetniñ qanunsız faaliyeti sebebinden yüz bergen meselelerniñ çezilüvinde işbirlik aqqında añlaştılar.