Bugün, berim ayınıñ 23-de, Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç Ukraina Prezidenti Ofisiniñ matbuat merkezinde teşkil etilgen ”Akimiyet, cemiyet ve matbuat vastaları: ukrainalılarnıñ fikirince, silâlı davanı kimler baş ete bile?” mevzusında umum milliy tedqiqatnıñ neticelerini taqdım etüvde iştirak etti.

Taqdim etüvniñ diger iştirakçileri:

• Denis Kobzin, Harkiv içtimaiy tedqiqatlar institutınıñ müdiri;
• Alöna Lunöva, ZMİNA insan aqları merkeziniñ yöneticisi;
• Svitlana Kolışko, BM İnkişaf Programmasınıñ ”Ukraina içün insan aqları” leyhasınıñ reberi.

Tedqiqatnı 2021 senesiniñ saban-çiçek aylarında BM İnkişaf Programmasınıñ qol tutuvı ile Ukraina Prezidentiniñ Qırım Muhtar Cumhuriyetindeki Temsilciligi ve ZMİNA insan aqları merkeziniñ sımarışı üzerine Harkiv içtimaiy tedqiqatlar institutı keçirgen edi. Sorav bütün Ukraina regionlarında keçirildi, soravda 10 biñ kişi iştirak etti. Böyleliknen, kerçek neticeler elde etildi ve er bir vilâyette Ukraina sakinleriniñ cevaplarındaki farqlılıqlar belgilendi.

Ekspertler tedqiqatnıñ esas neticelerini taqdim ettiler ve devlet akimiyet organları ve cemaat teşkilâtları vaqtınca işğal etilgen topraqlarnıñ sakinlerinen bağlarını saqlap qaldırmaq, vaqtınca işğal etilgen topraqlarnı ğayrıdan integratsiya etmek, silâlı davanıñ aqibetlerini aşmaq ve Ukrainada bugünde-bugün keçici devirde adalet siyasetini amelge keçirmek içün bu neticelerni nasıl etip qullana bileceklerini tarif ettiler.

”Bu müim birinci umum milliy tedqiqat vatandaşlarımıznıñ Ukraina topraqlarındaki silâlı davağa munasebetini numayış ete. Bizim içün müim noqta, vatandaşlarımız halqara silâlı dava yüz bergenini, bu davanıñ bir tarafı ise Rusiye Federatsiyası olğanını añlaylar. Ve bu halqara silâlı dava Rusiye Federatsiyasınıñ Ukrainağa qarşı silâlı tecavuzı neticesinde yüz berdi.

Bizim içün müim olğan daa bir noqta, vatandaşlarımız Qırım Muhtar Cumhuriyeti ve Aqyar şeeri topraqlarınıñ işğal etilmesi ve Donetsk ve Lugansk vilâyetleriniñ ayrı rayonlarındaki silâlı dava aslında aynı halqara silâlı davanıñ eki parçası olğanını ve Rusiye Federatsiyasınıñ silâlı tecavuzı neticesinde yüz bergenini de añlaylar.

Bu tedqiqat em Ukraina Prezidentiniñ Qırım Muhtar Cumhuriyetindeki Temsilciligi, em de silâlı davanıñ aqibetlerini aşmaq maqsadınen keçici devirde adaletniñ milliy şeklini meydanğa ketirililüvi üzerinde çalışqan Ukraina Prezidenti yanındaki uquqiy islâat meseleleri boyunca Komissiya çerçivesindeki vaqtınca işğal etilgen topraqlarnı ğayrıdan integratsiya etüv boyunca iş gruppası içün pek müimdir.

Bundan ğayrı, silâlı davanıñ aqibetlerini aşuv meselesinde Ukraina vatandaşları eñ ziyade Ukraina Prezidentine işanğanları da bizim içün pek müim”, – dep izaatlay tedqiqatnı Daimiy Temsilci Anton Korınevıç.