”Al-azırdaki Qırım, aqsızlıq zonasıdır, mında Rusiye Federatsiyasını temsil etken işğalci akimiyetniñ vekilleri muntazam ve qaba şekilde insan aqlarını bozalar, arbiy cinayetlerni ve insaniyetke qarşı cinayetlerni işleyler. Vaqtınca işğal etilgen yarımadanıñ sakinleri içün pek ciddiy çağıruvğa çevirilgen ve işğalci akimiyet vekilleriniñ vaqtınca işğal etilgen topraqlarda yaşağan grajdan ealini yeterli derecede qorçalap olamağanını köstergen koronavirus (tacmaraz) pandemiyasınen bağlı vaziyet ayrıca müşküldir”, – dep izaatladı AHİT aza devletleriniñ eyetleri içün vaqtınca işğalniñ 7-nci yıllığı munasebetinen keçirilgen onlayn-brifing devamında Ukraina Prezidentiniñ Qırım MC-deki Daimiy Temsilcisi Anton Korınevıç.
Ukrainanıñ Daimiy Temsilciligi ve AHİT yanındaki Avropa Birliginiñ eyeti tarafından teşkil etilgen tedbirniñ esas maqsadı, vaqtınca işğal etilgen Qırım Muhtar Cumhuriyeti ve Aqyar şeeri topraqlarındaki vaziyetnen ecnebiy ortaqlarımıznı tafsilâtlı şekilde haberdar etmektir.
Brifing çerçivesinde Ukraina çetel işler naziriniñ birinci muavini Emine Caparova, Ukraina Prezidentiniñ Qırım MC-deki Daimiy Temsilcisi Anton Korınevıç ve Ukraina mudafaa naziriniñ Avropağa integratsiya meseleleri boyunca muavini Anatoliy Petrenko çıqışta bulundılar.