2019 senesi oraq (iyül) ayı 09 künü Ukraina Prezidentiniñ Qırım MC-deki Daimiy Temsilcisi Anton Korınevıç Herson şeerinde ”Qırım evi yüreklerni birleştire” medeniy-içtimaiy leyha çerçivesinde ”Qırımnıñ kelecegine bir nazar” mevzusında munaqaşada iştirak etti.

Tedbirde Qırımtatar Milliy Meclis reisiniñ muavini İlmi Umerov; vaqtınca işğal etilgen topraqlar meseleleri boyunca Nazirniñ birinci muavini Yusuf Kurkçı; aq qorçalayıcı, ”Qırım eviniñ” leyhalar boyunca müdüri, ”Qırım SOS” cemaat teşebbüsiniñ qurucılarından biri Alim Aliyev; Qırımtatar Milliy Meclisiniñ azası, Geniçesk rayon devlet memuriyetiniñ reis muavini Gulnara Bekirova-Alidinova; Vekâletliniñ Qırım MC ve Aqyar şeeri sakinleriniñ aqlarına riayet etüv boyunca Temsilcisi İsmail Halikov da iştirak ettiler.

Tedbir esnasında iştirakçiler vaqtınca işğal etilgen topraqlarda qırımtatar halqınıñ şimdiki vaziyeti, işğalci akimiyet tarafından Qırımnıñ tamır halqlarına qarşı cezalavlar, şahsiy vesiqalarını resmiyleştirgen Qırım sakinleri ve memleket içinde köçken şahıslar ögünde turğan meseleler boyunca fikirlerinen paylaştılar.

Munaqaşa iştirakçileri vaqtınca işğal etilgen Qırımnı Ukraina terkibine qaytaruv oğrunda devlet ve cemaat teşkilâtları öz ğayretlerini birleştirmek kerekler degen fikirge keldiler.