Bügün, saban (mart) ayı 3 künü vaqtınca işğal etilgen Qırımda, Aqmescitteki avtobus vokzalında Rusiye quvetçileri ukrain siyasiy mabusı Pavel Gribniñ mahkeme ceryanına Rostov-na-Donu şeerine ketmege niyetlengen Ukraina Ortodoks Kilisesiniñ Aqmescit ve Qırım arhiyepiskopı Klimentni yaqalap, onı çantasında kiliseden hırsızlanğan şeyler bulunğanında qabaatladılar.

Jurnalist Anton Naumlyuk bildirgen malümatqa köre, Klimentni sözde ”merkeziy rayon polis bölügine” ketirip, abulqat Emil Qurbedinovnıñ yanında ondan izaatlar alsalar da, sözde ”patrul-post hızmetiniñ” hadimlerinden protokollar almağa kerek dep, azat etmekni red ettiler. ”Bölükke” kelgen sözde Aqmescit ”polisniñ müdir muavini” Sergiy Nikitin kerek izaatlarnı bergen Klimentniñ azat etilmesini red etti.

Keççe belli olğanı kibi, arhiyepiskop Klimentni Aqmescit ”polisiniñ merkeziy rayon idaresinden” ”Kıyiv rayon idaresine” alıp ketkenler. Abulqat Nikolay Polozov atqanlarına köre, Klimentni ”ufaq yaramazlıqta” qabaatlamağa istegenler, o, Aqmescit bazarında bulunğan arada ”küfür etip sögüngen” emiş.

Aqşam saat sekizden soñ abulqat Nikolay Polozov, Ukraina Ortodoks Kilisesiniñ Qırım bölüginiñ arhiyepiskopı Kliment protokol tizilmeden yiberilgenini bildirdi.