2018 senesi arman ayı (august) 28-30 künleri AQŞ diplomatları vaqtınca işğal etilgen Qırımğa yaqın olğan rayonlarnı ziyaret ettiler, bu arada musafirler Herson vilâyeti devlet memuriyetiniñ reisi Andriy Gordeev, Qırımtatar Milliy Meclisiniñ Herson vilâyetinde vekili Abmecit Suleymanov, ‘‘Asker’’ cemaat birliginiñ yolbaşçısı Lenur İslâmov, diger vekâletli şahıslar ve cemaat faalcileri ile körüştiler. Ziyaret çerçivesinde arman ayı 30 künü Ukraina Prezidentiniñ Qırım MC Daimiy Temsilcisi Borıs Babin ve onıñ Birinci muavini İzet Gdanov AQŞ Elçihanesiniñ eyetinen – Siyasiy bölükniñ Ekinci kâtibi Anton Kuper ve Elçihaneniñ hadimi Tetâna Steçak ile iş körüşüvini keçirdiler.

Körüşüvde Temsilcilikteki hızmetlerniñ hadimleri ve Herson şeerinde ‘‘Qırım-Ukraina’’ leyhasını amelge keçirüv içün mesüliyetli olğan dört aliy oquv yurtnıñ davet etilgen vekilleri iştirak etti. Körüşüv esnasında vaqtınca işğal etilgen toprlaqlarnen bağlı olğan bir sıra problemli meseleler ve olarnı çezüv vastalar, bu cümleden ükümet ve qanun yaratıcılıq seviyelerde Ukraina qanuniyetine deñişmelerni kirsetüv ve Qırımda yaşağan Ukraina vatandaşlar ögünde turğan muayen ayatiy meseleler muzakere etildi. Vaqtınca işğal etilgen Qırım ile memuriy sıñırdan ana-babalarınıñ birisinden ruhset almadan balalarnı keçirüv ve qaçıruv meselesi de muzakere etildi.

AQŞ diplomatları ile işğalci devletniñ Azaq deñizinde qanunsız faaliyeti neticesinde Ukrananıñ iqisadiyatına yapılğan basqı muzakere etildi – istilâci devlet ‘‘deñizcilikniñ havfsızlığını’’ manaçıq etip, ukrain limanlarına kirecek ya da olardan çıqqan, Keriç boğazından keçken gemilerni qanunsız nezaret etüv içün toqtata, neticede mallarnı keçiktirgen gemilerniñ saiplerine büyük zarar ketire ve ihracattan kelirlerini azlaştıra. Temsilcilikniñ reberiyeti Azaq deñizinde Ukrainanıñ RF ile umumiy faaliyetni belgilegen qanuniyetke ve teşkiliy ameliyatqa deñişmeler kirsetmege kerek olğanını qayd etti.

Bundan da ğayrı, işğalciler tarafıdan Ukrainanıñ Qara deñizdeki qıta rafında kömür gidrogenni qanunsız şekilde istisal etüv, RF Qaradeñiz flotu tarafından ‘‘Çornomornaftogaz’’ obyektlerini arbiyleştirüv Qara deñizdeki Ukraina limanlarına gemicilik saasında büyük havflar yarata. RF işğalci akimiyeti öz siyasiy menfaatları oğrunda halqara uquqnı körmemezlikke urğanınıñ bir isbatı olaraq Qara deñizde balıq avı ile oğraşqan ‘‘ЯМК-0041’’ ukrain balıqçı gemisiniñ yaqalanuvını hatırladılar – Rusiye cezalav organları üç ay devamında qanunsız şekilde bu geminiñ taqımını reineler olaraq işğal etilgen Qırımda ve aynı vaqıtta yaqalanğan ukrain ‘‘Nord’’ gemisiniñ Ukraina vatandaşları olğan taqım azalarını ise Kıyivdeki RF Elçihanesinde reineler olaraq tutıp turdılar.

Qırımnı suv ile temin etüv meselesi, bu cümleden, işğalciler tarafından büyük miqdarda artezian suvlarını vahşıyca tehnkiy maqsatlarğa işletüv ve işğalci akimiyetiniñ Şimaliy-Qırım kanalından suv ile temin etüvni ğayrından tiklemek, Qırımğa ayrı mallarnı, bu cümleden, memuriy sıñırdan qırım şirketleri içün Ukrainanıñ nezareti altında bulunğan topraqlardan malzemelerni taşımaq ıntıluvlarına Temsilcilik tarafından qarşılıq kösterüv muzakere etildi.

Qırım sakinleriniñ Ukraina aliy oquv yurtlarına oqumağa kirişleri aqqında ‘‘Qırım-Ukraina’’ tasil leyhasınıñ Herson vilâyetinden toplaşuvda bulunğan dört aliy oquv yurtnıñ mesüliyetli kâtipleri qayd etti ki, bu sene kiriş kampaniyasınıñ hususiyeti – yuqarıda qayd etilgen merkezler vastalarınen Qırım sakinlerinden pek çoq muracaat alındı. Oqumağa kelgen qırımlılarnıñ ekseriyeti Qırımda qanunsız aliy oquv yurtlarından qıta Ukrainağa oqumağa avuşqanlardır. Bundan da ğayrı, maarif saasında çalışqanlar qırımlılar hususan Herson vilâyetinde tolu olmağan orta tasil temelinde oquv yurtlarğa kirmege aves etkenlerniñ miqdarı artqanını qayd ettiler. Tasil merkezlerniñ vekilleri kiriş kampaniyası devamında kiriş içün kerekli vesiqalarnıñ resmiyleştirüvi ile bağlı olğan bütün meseleler Temsilcilikniñ mütenasip hızmetlerni bergen devlet organları ile işbirligi neticesinde deral çezilgenini qayd ettiler. Temsilcilikniñ reberiyeti ‘‘Qırım-Ukraina’’ leyhası çerçivesinde belgilengen universitetlerniñ haber kampaniyasını aydınlattı, bu kampaniya neticesinde vaqtınca işğal etilgen yarımadada yaşağan abituriyentler Ukraina vilâyetleriniñ bir çoq aliy oquv yurtları aqqında obyektiv malümat aldılar. Bu sene Kıyiv şeeriniñ, Lviv ve Odesa vilâyetleriniñ aliy oquv yurtlarına Qırımdan oqumağa kelgen şahıslarnıñ miqdarı arttı. Aynı vaqıtta Ukrainadan hırsızlanğan mülkiyetnen faydalanıp vaqtınca işğal etilgen topraqlarda tasil hızmetlerni bergen RF universitetlerine qarşı sanktsıyalarnı kirsetmege kerek olğanı qayd etildi. Ukraina ve dünyanıñ medeniy devletleri iç bir vaqıt RF tarafından işğal etilgen Qırımda berilgen diplomlarnı tanımazlar.

Körüşüvniñ neticesi olaraq taraflar Ukrainada AQŞ elçiliği ile Qırımda işğalci devletniñ bir sıra yönelişte areketleri içün sıñırlayıcı tedbirler boyunca işbirlikni devam ettirmege añlaştılar. Körüşüv çerçivesinde AQŞ elçihanesiniñ vekilleri Herson şeerinde ‘‘Dokument’’ devlet müessisesiniñ yañı binasını ziyaret etip, vaqtınca işğal etilgen Qırımnıñ sakinlerine berilgen memuriy hızmetleriniñ Avropa seviyesinde keyfiyeti ile şahsen tanış oldılar.

‘‘Qalançaq’’ KÇNN ziyaret etüvniñ esnasında amerikalı diplomatlar KÇNN abadanlaştırıluvı (aydınlatuv, saçaq, piyadeler yolu) boyunca acele tedbirlerni, BMT qaçaqlar meseleleri boyunca Yuqarı komissar İdaresiniñ bu meselerler boyunca evelki yardımını ve Ukraina Nazirler Şurası tarafından KÇNN abadanlaştırıluvına ayrılacaq qoşma maliyeni muzakere ettiler, Temsilcilik acele sürette abadanlaştıruv ve KÇNN-dan qanuniy vilâyet içi avtobus naqliyatını teşkil etüv boyunca öz nazar noqtasını bildirdi.

Qalançaq qasabasına ziyaret esnasında Qalançaq qasaba şurasınıñ reberiyeti ile bu mesken yerde Qırım sakinlerine de pasport hızmetlerini berecek Memuriy hızmet merkeziniñ teşkil etilüvi muzakere etildi. Amerikalı diplomatlar Memuriy hızmet merkezi içün azırlanğan binanı ziyaret etip, işbu merkezni Ukrainada USAID ofisiniñ yardımı ile donatuvnı muzakere ettiler.