2018 senesi çiçek ayı (aprel) 24 künü Ukraina Prezidentiniñ Qırım MC Daimiy Temsilcisi Borıs Babin çetel mütehassısları iştiragı ile Odessa şeerinde keçirilgen Ukraina Silâlı Quvetleriniñ ADQ-niñ 2035 senesine qadar inkişafi strategiyasına qıymet kesüv boyunca seminarda iştirak etip, seminarnıñ ‘‘Ukrainanıñ deñiz havfsızlığında Qırım faktorı’’ serlevalı bölüginde maruzanen çıqışta bulundı.

Maruzasında Borıs Babin Ukraina SQ ADQ 2035 senesine qadar inkişaf strategiyasını Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele areket Planınıñ Temsilcilik tarafından azırlanğan leyhasınen ve bu sene kene de Temsilcilik tarafından azırlanacaq Qırımnıñ işğalden azat etilüvinden soñ ğayrıdan integratsiyası boyunca Strategiyanen uyğunlaştırmağa pek muim olğanını qayd etti. Seminar devamında Daimiy Temsilci Ukraina SQ ADQ Komandanı İgor Voronçenko ile işbirliknen bağlı meselelerni muzakere etti, RF Qırımnıñ etrafındaki deñiz suvlarını askerleştirgenine ve başqa meselelerge Büyük Britaniya ve AQŞ arbiy missiyalarınıñ vekilleriniñ diqqatını çekti.

Rusiye istilâsına qarşılıq kösterüvden ğayrı, 1918 senesi çiçek ayı 29 künü Aqyarda Ukraina Arbiy-Deñiz bayrağınıñ köterilüviniñ 100-yıllığınaTemsilcilikni celp etüv de muzakere etildi.