”İlk nevbette, qarar Rusiye Federatsiyasınıñ devletimizge qarşı silâlı istilâsı munasebetinen uquqiy cebede Ukrainanıñ müim ğalebesidir.

Bu qarar Rusiyeniñ 2014 senesi kiçik ayınıñ soñundan Qırımda insan aqları bozuluvları içün mesüliyetli olğanını (bu müddet içinde ise Qırımda pek çoq qorqunçlı cinayetler yüz berdi, şu cümleden, qırımtatar faali Reşat Ametov zorbalıqnen ğayıp etilip öldürildi) belgilemeknen yetinmey. Aynı vaqıtta o, RF akimiyeti tarafından bu yıllar devamında muntazam surette darqatılğan şiar ve uydurmalarnıñ yalan olğanını isbaatlay.
Asılında, yalancı referendum ve Rusiye Federatsiyasına qoşulmağa qarar bergen ”Qırım halqınıñ” iradesini sözde ifade etken başqa areketlernen bağlı manipulâtsiyalar böyleliknen toqtatıla.

Kiçik ayınıñ 27-den soñ yüz bergen bütün adiseler, Ukraina topraqlarınıñ işbu qısımında yaşağan ealiniñ qararı degil de, RF keçirgen arbiy ameliyatnıñ neticeleridir.
Misal olaraq, mahkeme 2014 senesiniñ qara qış ayından başlap Qırımda RF ordusınıñ sayısı aceti olmadan ve Ukraina akimiyetinden razılıq almadan bayağı artqanına diqqat etti. Bundan ğayrı, 2014 senesi kiçik aynıñ 22-den 23-ne keçer gecesinde Putinniñ ”Qırımnı Rusiyege qaytaruv oğrunda areketler yapmaq” qararınen bağlı halq ögündeki çıqışlarına diqqat etildi.

Ögümizde nevbetteki müim vazife turmaqta – Ukraina tarafından beyan etilgen Qırımda insan aqları bozuluvlarğa dair davanıñ baqılmasıdır.
Bütün beyan etilgen adiseler boyunca RF tarafından yapılğan bozuluvlarğa dair küçlü deliller ve isbatlar ketirmelimiz.
Bundan ğayrı, al-azırda Mahkemede Ukrainanıñ RF qarşı başqa davaları da baqılmaqta. Şu cümleden, RF topraqlarına Qırımdan siyasiy mabuslarnıñ avuştırılmasına şikâyet ettik. Bu arizalar keççe berilgeni içün kelecekte baqılacaqlar.

Bu faaliyette bütün bu yedi yıl devamında işğal etilgen yarımadada yüz bergen cinayetlerni qayd etken, taqip etken ve aqları bozulğan şahıslarğa yardımda bulunğan uquq qorçalav organları, prokuratura ve cemaat teşkilâtlarınıñ beraberlikte çalışqanları soñ derecede müimdir.
Ve elbette uquqiy mevamımızda izçen ve sabırlı olmalımız, çünki yekünleyici qarar alınğance, daa bir qaç yıl keçer”.