Noyabr 8 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin, Avropa Şurası Baş kâtibiniñ Mahsus temsilcisi Reji-bey Briya ile Kiyevde iş körüşüvini keçirdi. Qırımdan devlet içinde köçken şahıslarnıñ ve Qırım sakinleriniñ aq-uqularını qorçalavına yönelgen işbirlikniñ acele ve strategik yolları muzakere etildi.

Mahsus temsilci, Qırım sakinleriniñ medeniy, içtimaiy ve emek aqlarınıñ yerine ketirüvi içün pasportlarınen bağlı meseleleriniñ çezilüvi ilk nevbette olğanınen  razı oldı. Mahsus temsilci, Qırım sakinleri içün Herson vilâyetinde teşkil etilecek memuriy ve naqliy hızmetlerine dair Daimiy Temsilcilik teklif etken planınen tanış olıp, oña yüksek qıymet kesti. Mahsus temsilci Halqara iş teşkilâtı ve Avropa Şurasınıñ uyğunlaştırılğan içtimaiy standartlarğa Ukrainanıñ da qoşulğanı istenilgenini bildirdi, bu ise, onıñ fikirince, Qırımdaki Ukraina vatadaşlarınıñ aq-uquqlarınıñ kerçekleşmesine yardım eter. Daimiy Temsilci Mahsus Temsilcige istilâci memleket insan aqları, tamır halqlarınıñ aqları ve insaniy aq-uquqları boyunca halqara standartlarını qaba şekilde bozğanını tarif etti.