Noyabr 8 künü Ukraina Devlet sınır hızmetiniñ askerleri Sivaş limanında qanunsız qanqurt (motıl) biologik resurslarınıñ istisal etilmesini toqtattılar. Limanğa ufaq yaldav aletinde kerekli ruhset almayıp çiqqan şahıslar memuriy cezağa çekildiler.

Tabiat parkı topraqlarında qanqurt istisal etilmesine ruhsetleri olmağanı içün qanunnı bozğan şahıslarda sıñırcılar üç motopompa taptılar. Bundan da ğayrı, askerler Azaq-Sivaş milliy tabiat parkınıñ vekillerini ve Milliy politsiyanıñ Geniçeskteki bölüginiñ hadimlerini çağırdılar. Milliy tabiat parkınıñ vekilleri balıq avını qaba şekilde bozup avlamağa tırışqan şahıslarınıñ yolbaşçısı olğan yerli iş adamına qarşı memuriy protokol tizdiler. Politsiya hadimleri cinaiy iş açıp, qanunğa riayet etken şekilde motopompalarnı tutıp aldılar. Bundan soñra işbu motopompalar makeme qararına köre kene de şu iş adamına saqlap tutması içün qaytarıldı.

Askerler, milliy tabiat parkınıñ vekilleri ve polis hadimleri tarafından yürsetilgen yuqarıda qayd etilgen areketler devamında iş adamı vaqtınca işğal olunğan Qırımnıñ sıñırına yaqın olğan topraqlarda vaziyetni kerginleştireceginen olarnı sözlü şekilde qorqutmağa tırıştı. Geniçesk rayonında vaziyetke menfiy şekilde tesir etmeğe ıntıluvlar, böyle areketlerge uquq qorçalayıcılarınıñ qarşılıqları Ukraina Prezidentiniñ Qırım Muhtar Cumhuriyetindeki Daimiy Temsilcilikniñ mahsus nezareti altında bulunmaqta.