2018 senesi saban ayı (mart) 25 künü Ukraina devlet sıñır hızmeti deñiz bekçileriniñ gemisi Ukrainanıñ nezareti altında bulunğan Azaq deñiziniñ rayonında RF bayrağı altında yaldağan qanun bozucı ‘‘Nord’’ balıqçı gemisini ve onıñ içinde bulunğan 10 şahısnı yaqaladı. ‘‘Nord’’ gemisi Obitoçna beline 15 mil yaqınlığında toqtatıldı, teşkerüv esnasında bu gemi Ukrainanıñ vaqtınca işğal etilgen Qırım toprağında qaydqa alınğanı, yani qanunsız alda RF bayrağını qullanğanı belli oldı. Bundan da ğayrı, ‘‘Nord’’ gemisiniñ taqımı Ukrainanıñ vaqtınca işğal etilgen topraqtan qanunsız şekilde kelip çıqtı ve bütün şahıslarnıñ yanında Kerç şeerinde berilgen sözde ‘‘RF vatandaşı pasportları’’ bar edi.

Al-azırda yaqalanğan gemi ve onıñ taqımı nevbetteki teşkerüv ve protsessual areketlerniñ yapılması içün Berdânsk limanına ozğarıldı. Bundan da ğayrı, geminiñ teşkerüvi esnasında balıqçılıq tralı ve 5 tonna deñiz mahsulatları tapıldı. Cinayet aqqında savcılıq bölüklerine, Ukraina Havfsızlıq Hızmetiniñ Qırım MC Baş idaresine ve Milliy Politsiyanıñ Zaporijjya vilâyetinde Baş idaresine haber etildi. Yaqalanğan deñiz taqımınıñ azalarına qarşı Ukrainanıñ Memuriy tertip bozuv aqqında kodeksiniñ 204-2 maddesi boyunca memuriy protokollar tizildi, Ukraina Havfsızlıq Hızmetine gemi kapitanınıñ areketlerine Ukraina Cinaiy Kodeksiniñ 332-1 maddesi boyunca qıymet kesileceği aqqında bildirüv yollanıldı.

https://dpsu.gov.ua/…/%20VIDEO%20-V-Azovskomu-mori-prikord…/