AQŞ yalı qoruv bazasında Ukraina Arbiy Deñiz Quvetlerine eki ‘‘Island’’ sınıfı devriye katerlerini teslim etüvge bağışlanğan tantanalı tedbirde çıqışta bulunğan Ukraina Prezidenti Petro Poroşenko bir kere daa işbu fikirini tekrarladı: dünyanıñ liderleri öz mevamında turmağa, sanktsıyalarnıñ quvetleştirilüvine qol tutmağa devam etse, Ukraina öz istilâcısını mıtlaqa yeñer.

‘‘Basqını devam etsek, Qırım Moskova içün köterilmez yükke çevirilir ve Kreml içün istilânıñ iç bir manası qalmaz. Rusiye öz mesüliyetsiz areketleri, Qırımnı qanunsız işğal etüvi, devletimizniñ Şarqında tecavüzi içün ödemege başladı. Sanktsıyalar çalışa ve olarnı daa ziyade quvetleştirmege kerek’’, – dep qayd etti Devletimizniñ Başlığı.

Ukraina Prezidenti, Qırım yarımadası Ukrainanıñ egemenligi altına qaytsa, RF Qaradeñiz regionında vaziyetni kerginleştrimek ve başqa devletlerge tecavüz yapmaq imkânından marum qalacağında eminligini bildirdi.

‘‘Qırımnıñ azat etilüvinden soñ Rusiye çıqış meydançığını ğayıp etip, Süriyede öz küçini numayış etalmaz, Qara deñizde NATO içün telüke yaratamaz ve kütleviy yoq etüv vastalarğa qarşı AQŞ-nıñ reberliginde alınıp barılğan küreşke Qırımda sovet özek silâlarını ğayrıdan tiklevnen manilar yaratamaz’’, – dep qayd etti Petro Poroşenko.