Ukraina Prezidenti Petro Poroşenko grigorian taqvimi boyunca Milâd bayramını qayd etken ukrainalılarnı hayırladı. O, bir qaç kün evelsi Sofiya meydanında ukrainalılar mustaqil yerli ukrain Ortodoks kilisesiniñ teşkil etilüvini qayd etkenlerini hatırlattı.

”Biz avtokefal Ukraina Ortodoks Kilisesi doğuvınıñ şaatları oldıq, bügün ise mında katolikler ve protestantlar toplandı. Moskovadan mustaqil ve Ortodoks dünyası tarafından tanılğan ukrain kilisesiniñ teşkil etilüvine qol tutqanıñız içün sizge öz minnetdarlığımnı bildirem”, – dep qayd etti Petro Poroşenko.

”Devlet kilisemiz yoq ve olmaycaq. Bunıñ yerine kerçek diniy serbestlik üküm süre ve biz onı qaygı ile qorçalaymız. Bütün farqlılıqlarımızğa baqmadan, bizni Ukraina ve bizim İsa Peyğamberimizniñ doğuvına inançımız birleştire”, – dep qoştı Prezident.

Ukrainalılarğa muracaat eter eken, devletimizniñ Başlığı qayd etti ki, ”duşmanımız olsa da, bizim devletimizni ve halqımıznı başqalar esir etmege istese de, bizde qorqu yoq”. ”Biz quvanamız, çünki doğğan İsa bizni teselli ete ve öz sevgisinen sara”, – dep ayttı Prezident ve havari Pavelniñ ”Tañrı bizim tarafımızda olsa, bizge qarşı kim çıqar” degen sözlerini hatırlattı.

”İnanam ki, İsa ile beraberlikte biz nefretni ve yamanlıqnı yeñermiz, İsa doğıp, dünyağa tınçlıqnı ketirdi. Milâd – bu sır ve aileviy sıcaqlıq ile bağlı olğan ümüt bayramıdır. Vifleyem qobasında bu dünyağa Peyğamber kelip, bizni qorçalamaq içün öz dünyeviy yolunı başladı”, – dep qayd etti Poroşenko.

”Sizge meleklerden – quvanç, çobanlardan – ayret, aqıldanelerden – basiret, doğğan Peyğamberden ise – sevgi ve tınçlıq tileyim. Quvançlı Milâd ile şeñ bayramlar tileyim”, – dep hayırladı ukrainalılarnı Prezident.