”Quvetleştirilgen qararname pek müim, o, Ukrainanıñ egemenligine ve topraq bütünligine qol tutuvnıñ isbatıdır. Bu, Qırım yarımadasınıñ vaqtınca işğal etilgen topraqlarındaki muntazam şekilde insan aqlarınıñ bozulmasına işaret etken ve dünya cemiyetiniñ eñ yüksek seviyede diqqatını celp etken Baş Assambleyanıñ beşinci qararnamesidir. Şunı da qayd etmek kerek ki, bu yıl qabul etilgen qararnamede pek çoq yañı madde peyda oldı. Qararnamege ilk kere ”grajdan jurnalistler” degen ibare kirsetildi. Bundan ğayrı, vesiqa vaqtınca işğal etilgen Qırım yarımadasınıñ tabiat menbalarını tüketken ve etraf müitke menfiy tesir etken Rusiyeniñ hocalıq faaliyetinde de tafsilâtlı şekilde toqtala. Qararname, Rusiye Qırımdaki gençlerniñ ve balalarnıñ Ukraina tasil imkânlarına irişimlerini sıñırlaştırğanını, vatandaşlarımıznıñ diniy aqlarını bozğanını qayd ete.

BM Baş Assambleyası öz qararnamesi ile Rusiyeni halqara nezaret etici missiyaları, şu cümleden, BM insan aqarı boyunca Ukrainada nezaret etici missiyası ve AHİT Mahsus nezaret etici missiyası içün Qırımğa maniasız ve tam irişimni temin etmege çağıra.

Cemaat aq qorçalayıcı teşkilâtlarından ortaqlarınen beraber 2020 senesi saban ayınıñ soñundan berli işbu qararname içün teklifler azırlağan Ukraina Prezidentiniñ Qırım MC-deki Temsilciligi qararnıñ qabul etilmesini memnüniyetliknen alğışlay”, – dep izaatlay Ukraina Prezidentiniñ Qırım MC-deki Daimiy Temsilcisi Anton Korınevıç.

”İşbu qararname Qırımnı ilhaq etmek teşebbüsine dair halqara tanımamazlıq siyasetini quvetleştirmek manasında Qırımdaki Rusiye Federatsiyası orğanlarınıñ ve vekâletli şahıslarınıñ faaliyeti qanunsız olğanını açıq-aydın qayd etmekte. BM seviyesinde bu kibi vekâletli şahıslarğa yalıñız ”Rusiye Federatsiyasınıñ işğalci akimiyeti” olaraq qıymet kesmek kerek olğanı ilk kere qayd etildi”, – dep bildire öz beyanatında Ukraina çetel işler Nazirligi.