2018 senesi saban ayınıñ (mart) 14 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikniñ halqara alâqalar hızmetiniñ vekili Ukrainada BMT İnsan aqları boyunca közetüv taqımınıñ başlığı ve vekilleri ile iş muşaveresi şekilinde körüştiler.

Körüşüv devamında taraflar Qırımnıñ vaqtınca işğali ve devam etken risiye tecavüzi ile bağlı olıp, al-azırda acele sürette çezilecek bir sıra gumanitar meselelerni muzakere ettiler.

Borıs Babin Temsilcilikniñ gumanitar, tasil, havfsızlıq, Qırımda yaşağan Ukraina vatandaşlarına ya da Ukrainanıñ nezareti altında bulunğan topraqlarda maküm etilgen Qırım sakinlerine memuriy hızmetlerniñ berilüvinen bağlı olğan kündelik faaliyetinen tanıştırdı. BMT vekilleri işğalci akimiyet tarafından insan aqlarınıñ bozuluvı ve Qırım sakinleriniñ Ukraina akimiyet organlarına muracaatları boyunca berilgen tafsilâtlı malümatlar içün Temsilcilikke teşekkür ettiler.

Taraflar Qırımda Ukraina vatandaşlarınıñ ve Ukrainanıñ penitentsiar muessiselerden azat etilgen şahıslarnıñ pasport vesiqalarınınıñ resmiyleştirilüvi, Qırımğa yaqın olğan rayonlarda Memuriy hızmet merkezleri ağınıñ teşkil etilüvi, Vadim stantsiyasına qadar demiryol alâqasınıñ uzatıluvı ve qanuniy avtobus taşımalarınıñ teşkil etilüvi saasında Temsilcilikniñ areketlerini muzakere ettiler. Muzakere devamında Ukrainanıñ temel halqlarınıñ aq-uquqlarına ve olarnıñ Qırımda bozuluvına ayrıca diqqat etildi. Bundan da ğayrı, işğal etilgen Qırımda sözde ‘‘saylavlarnıñ’’ keçirilüvi ve vaqtınca işğal etilgen topraqlarda esas insan aq-uquqları saasında bunınen bağlı telükeler, işğalci akimiyet tarafından kütleviy ve qaba şekilde insan aq-uquqlarınıñ bozuluvı muzakere etildi. Borıs Babin sözde ‘‘saylavlarnıñ’’ teşkil etilüvinde, azırlanuvında ve keçirilüvinde iştirak etken şahıslar cinaiy mesüliyetke çekilecekleri aqqında haber etti.

Qırımda RF-nıñ işğalci siyaseti tasil, medeniyet, til ve din saalarına büyük menfiy tesir etip, olarnıñ inkişafına yol bermegeni ve atta yasaq etilüvine ketire bilgeni qayd etildi. Taraflar Közetüv taqımınına deviriy şekilde Ukrainanıñ nezareti altında bulunğan topraqlarda Qırım sakinleriniñ ve maküm etilgen şahıslarnıñ aq-uquqlarına riayet etilüvi boyunca Temsilcilikten tasdıqlanğan malümatlar berilecegi aqqında añlaştılar.