2018 senesi ekim (oktâbr) ayı 2 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ hadimleri Yevgen Samuha ve Valeriya Pahomova BMT İnsan aqları boyunca nezaret etici missiyasınıñ yolbaşçısı Fiona Freyzer ve Missiyanıñ başqa vekilleri ile körüştiler.

BMT vekilleri işğalci akimiyet tarafından insan aqlarınıñ bozuluvı ve qırımlılarnıñ Ukraina akimiyet organlarına muracaatları boyunca Temsilcilik bergen çeşit türlü malümatlar içün öz minnetdarlıqlarını bildirdiler ve bu malümatlarnı Missiyanıñ vesiqalarında işletkenlerini qayd ettiler.

Körüşüv esnasında taraflar siyasiy mabuslarnıñ qorantalarına ve Qırımdan kelgen başqa Ukraina vatandaşlarına olarnıñ muayen meseleleriniñ çezilüvi, Qırımğa yaqın olğan rayonlarda memuriy hızmet merkezleriniñ açıluvı boyunca Temsilcilikniñ areketlerini muzakere ettiler, Temsilcilikniñ muvafaqiyetlerini ve bu yönelişte faaliyetiniñ istiqbalini qayd ettiler.

Borıs Babin Temsilcilikniñ qanun yaratıcılıq saasındaki simdiki faaliyeti, bu cümleden, işğal etilgen Qırımda ölüm adiselerini resmiyleştirüv boyunca mahkeme ceryanını qolaylaştıruv, yarımadanıñ sakinlerine bedava ekinici nevbet uquqiy yardımnı berüv, qırımlılar içün adliyege irişimni qolaylaştıruv boyunca qanun leyhaları aqqında haberdar etti.

Vaqtınca işğal etilgen topraqlarnıñ sakinleri içün evlenüv ceryanını qolaylaştırğan ve Ukraina Yuqarı Şurasınıñ aile, gençlik siyaseti, sport ve turizm meseleleri boyunca Komiteti tarafından qol tutulğan 8400 sanlı qanun leyhası muzakere etildi.

Deñizde RF istilâsınıñ artuvı şaraitlerinde ukrain balıqçıları aq-uquqlarınıñ qorçalavı baqıldı, Yuqarı Şuranıñ İnsan aqları boyunca Vekâletlisi ve uquq qorçalayıcılar ile işbirlikniñ imkânları aydınlatıldı.

Körüşüvniñ neticesi olaraq, taraflar umumiy tedbirlerni keçirüv imkâniyetini muzakere ettiler ve vekâletleri çerçivesindeki vazifelerni daa semereli şekilde yerine ketirmek maqsadınen kelecekte malümatlarnen paylaşuvnı devam etmege añlaştılar.