2018 senesi berim ayı (sentâbr) 5 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ baş mesleatçısı Valeriya Pahomova BMT qaçaqlar işleri boyunca Yuqarı Komissar İdaresiniñ vekili Pablo Mateu ve Agentlikniñ hadimleri ile körüştiler
. Borıs Babin Temsilcilikniñ kündelik faaliyeti ile tanıştırdı, ölüm adiselerni qayd etüv, Qırım sakinlerine bedava ekinci nevbet uquqiy yardımnı berüv, qırımlılarnıñ adliy hızmetlerge irişimi kibi meselelernen bağlı olıp, Temsilcilik tarafından azırlanğan qanun leyhalarını taqdim etti. Ukraina Yuqarı Şurasınıñ aile, gençlik siyaseti, sport ve turizm boyunca Komiteti tarafından qol tutulğan ve işğal olunğan topraqlarnıñ sakinleri içün evlenüv ceryanını qolaylaştıracaq № 8400 qanun leyhası muzakere etildi. Vaqtınca işğal etilgen Qırımğa yaqın olğan rayonlarda Memuriy hızmet merkezlerini teşkil etüv, qırımlılarnı mesken ile temin etüv, KÇNN-dan keçüv esnasında insan aqlarına riayet etüv, vaqtınca işğal etilgen topraqlarnıñ sakinlerine qıta Ukrainada memuriy, naqliy ve tasil hızmetlerni berüv muzakere etildi. Bundan da ğayrı, işğal etilgen Qırımda ve qomşu rayonlarında ekologik vaziyetni ve ‘‘Qırım titanı’’ zavodında yüz bergen zeerli malzemelerniñ patlavı ile bağlı olğan içtimaiy vaziyetni muzakere ettiler.

Körüşüvniñ neticesi olaraq, taraflar kelecekte işbirlik ve memleket içinde mecburen köçken şahıslarnıñ ve Qırımdaki Ukraina vatandaşlarınıñ aq-uquqlarını qorçalav oğrunda umumiy tedbirler aqqında añlaştılar.