2019 senesi aprel 09 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov, ”Qalançaq” KÇNN-nı Temsilcilikniñ hadimi ile beraberlikte ziyaret etken BMT QİYKİ ofisiniñ ve «Desâte kvitnâ» cemaat teşkilâtınıñ vekilleri ile körüşti.
Körüşüvde strategik araştıruvlar Milliy institutınıñ Qırım ve Tavriya regionı boyunca vekili de iştirak etti.
Körüşüv esnasında taraflar vaqtınca işğal etilgen Qırım topraqlarında yaşağan Ukraina vatandaşlarına ve memleket içinde köçken şahıslarğa berilgen uquqiy yardımnıñ hususiyetlerini aydınlattılar.
Daimiy Temsilciniñ Birinci muavini yuqarıda añılğan Ukraina vatandaşlarınıñ qanuniy aq-uquqlarını yerine ketirüv saasında Temsilcilikniñ faaliyetini taqdim etti, künde 24 saat devamında olarnıñ muracaatlarını qabul etken alâqa ağları çalışqanını, birinci nevbetteki bedava uquqiy yardım berilgenini ve vaqtınca işğal etilgen yarımada sakinleriniñ meselelerini acele sürette çezmek maqsadınen Ukraina devlet migratsiya hızmetiniñ ve Ukraina adliye Nazirliginiñ yerli bölüklerinen sıqı munasebette bulunğanını haber etti.
Bundan da ğayrı, Temsilcilik memuriy hızmet merkezleriniñ teşkil etilüvinde iştirak etkenini de hatırlattı. Memuriy sıñırdan keçüv yerlerinde infraterkipni minimal seviyede qolaylaştıruv, bu cümleden, piyade yolaqlarnı abadanlanlaştıruv, noqtalarnı içilecek suv ile temin etüv, saçaqlarnı quruv, analar ve balalar içün odalarnı donatuv, mütenasip sanitar şaraitlerni yaratuv kibi meseleler ayrıca muzakere etildi. Qalğan infraterkip ise yarımadağa yaqın olğan rayonlarda inkişaf etilip, Qırım işğalden azat etilgen soñ da cemaatqa hızmet eter.
”Bizim içün bu, Qırımğa alıp ketken yoldır, işğalcilerge oşap, ”daimiy” KÇNN-nı qurmağa kerekmey. Vaqtınca işğal etilgen Qırım ile memuriy sıñırdan keçken vatandaşlar içün minimal infraterkip şaraitlerini yaratmalımız”, – dep qayd etti İzet Gdanov.
Aynı şu künü ”Qalançaq” KÇNN-nı ziyaret etken BMT QİYKİ vekilleri bu fikirnen razı oldılar.
Körüşüvniñ soñunda BMT QİYKİ vekilleri haber aqımını quvetleştirmek ve işğalci akimiyetniñ reinelerine çevirilgen vatandaşlarnıñ qanuniy aq-uquqlarına ve menfaatlarına riayet etmek maqsadınen gumanitar saada işbirlikke azır olğanlarını bildirdiler.