Devlet başlığı çıqışınıñ büyük qısmını vaqtınca işğal etilgen Qırım Muhtar Cumhuriyeti ve Aqyar şeeri topraqlarınen bağlı meselelerge bağışladı, şu cümleden Ukraina mustaqilliginiñ 30-yıllığını qayd etüv munasebetinen Volodımır Zelenskıy Qırımnı işğalden azat etüvge dair strategik baqışlarnı şekillendirüv içün esas meydançıq vazifesini Qırım platformasınıñ arman ayınıñ 23-de keçirilecek ilk sammiti becerecegini qayd etti.

”Qırım yarımadamıznı işğalden azat etüvnen bağlı birinci tedbirimiz. Bir çoq devletlerniñ vekilleri kelecek. İşbu platformada müim vesiqalar imzalanacaq. Başqa devletlerniñ prezidentleri, baş nazirleri, diniy adamları bulunacaq. Spikerler ve çetel işler nazirleri de davet etildi. Fikirimce, 30 devletniñ vekilleri kelecek”, – dep qayd etti Volodımır Zelenskıy.

Bundan ğayrı, halqara liderler Ukrainağa öz ömür arqadaşlarınen kelecekleri sebebinden aynı şu künü Ukraina tarafından birinci hanım ve efendiler Sammitiniñ başlatılması planlaştırıla.

”Anda pek müim, amma ekseriy allarda liderler tarafından köterilmegen insaniy meseleler köterilecektir”, – dep bildirdi Prezident.

Bundan ğayrı, şu künleri Prezident halqara liderlerinen bir çoq eki taraflama körülüvler keçirmege niyetlene.

Qırım platformasınıñ faaliyetine qıymet keser eken, Prezident, içinde adliyeciler, iqtisatçılar, başqa mütehassıslar çalışıp, qırımlılarğa yardım kösterecek, olarnı qorçalaycaq daimiy ofis açılacağını, sammitten evel ise Prezident vaqtınca işğal etilgen Qırım sakinleriniñ ve şu cümleden tamır halqlarınıñ problemli meselelerini çezüvni maqsat etip qoyğan bir sıra müim qanun leyhalarınıñ qabul etilmesini beklegenini haber etti.

Fotoresim Ukraina Prezidenti Ofisi