Tedbirni Ukraina Ortodoks Kilisesi ve Ukraina Prezidentiniñ Qırım Muhtar Cumhuriyetindeki Temsilciligi teşkil ettiler. Daimiy Temsilci Anton Korınevıç Mitropolit Yepifaniyge musafirçenligi ve vaqtınca işğal etilgen Qırımnıñ sakinleri içün pek muim olğan mevzunı muzakere etmege azır olğanı içün öz minnetdarlığını bildirdi.
Ukraina halq deputatı, gumanitar ve haber siyaseti Komitetiniñ reis muavini Yevgeniya Kravçuk qayd etti ki, Ukraina Ortodoks Kilisesiniñ Qırım patrikhanesi öz ibadetlerini keçirgen Aziz Volodımır ve Olğa knâzları adına kafedral kilise binasınıñ Ukraina devlet mülkiyetine keçirilüvi aqqında qararğa mütenasip komitet qol tuttı ve işbu qarar Ukraina Yuqarı Şurasınıñ nevbetteki toplaşuvlarnıñ birinde baqılacaqtır.
Qırım MC Prokurorı İgor Ponoçovnıy öz çıqışında diniy serbestlikleriniñ bozuluvı ile bağlı olğan cinayetlerni qayd etmek ve Qırımdaki Ukraina Ortodoks Kilisesiniñ taqip etilmesini taqiq etmek kerek olğanını qayd etti. İgor efendi, Qırım Muhtar Cumhuriyetiniñ Prokuraturası vaqtınca işğal etilgen Qırımda Ukraina Ortodoks kilisesine yapılğan basqı munasebeti ile diniy cemiyetlerni taqip etken işalci akimiyetniñ vekillerine qarşı açılğan üç cinaiy işke reberlik yapmaqta olğanını haber etti. Bu cümleden, 2014 senesi ilk yaz (iyün) ayı 1 künü silâlı şahıslar Kıyiv Patrikhanesi Ukraina Ortodoks Kilisesiniñ Qırım MC Aqmescit rayonındaki Anğara (Perevalne) köyünde yerleşken Aziz Meryem ana adına kilise binasını zapt etilgenine, kilise hızmetçisine ve cemaatına öz ibadetlerini yerine ketirmege berilmegenine ve (huhusan Aqyar, Aqmescit, Kezlev şeerlerinde ve Anğara köyünde) Ukraina Ortodoks Kilisesiniñ Qırım Patrikhanesi İdaresine ait olğan taşınmağan ve taşına bilgen mülkniñ zapt etilmesi neticesinde Ukraina Ortodoks Kilisesiniñ mülkiyet aqlarınıñ bozuluvı ve onıñ hızmetcileri diniy merasimlerni yapmaq imkâniyetinden marum qalğanlarına dair cinayetlerdir.
Toplaşuv çerçivesinde Qırımtatar halqınıñ lideri Mustafa Cemilev, Qırımtatar Milliy Meclisiniñ reisi Refat Çubarov, Ukraina çetel işler Naziriniñ Birinci muavini Emine Caparova, Ukrainanıñ vaqtınca işğal etilgen topraqlarını ğayrıdan integratsiya etüv meseleleri boyunca Nazirniñ muavini İgor Yaremenko, Ukraina etnosiyaset ve vicdan serbestligi hızmetiniñ vekili çıqışlarda bulundılar.
Körüşüvde Amerika Birleşken Devletleri, Kanada, Litva, Latviya, Estoniya, Finlandiya, Moldova, Felemenk, İsviçre, İsveçiya, Slovakiya, Lehistan, Qaradağ, Çehiya, Belçika diplomatları, Ukrainada Avropa Birliginiñ ve BM Ukrainada insan aqları boyunca nezaret etici missiyasınıñ vekilleri iştirak ettiler.