‘Qırım mevzusı, Qırımnı işğalden azat etüv ve ğayrıdan integratsiya etüv yönelişinde çalışqan Ukraina Prezidenti taqımınıñ bir parçası olaraq, Ukraina Prezidentiniñ Qırım Muhtar Cumhuriyetindeki Temsilciligi içün, elbette, işğalden azat etüv ve ğayrıdan integratsiya etüv mesesi esas vazifelerimizden biridir. Bu sebepten bizler içün Qırım platforması ukrain bayrağı Aqmescit, Aqyar, Yalta, Bağçasaray ve başqa yerlerimizge qaytmasınen soñuna yetecektir.

Onıñ içün er şeyniñ oraq ayınıñ 23-de başlaycağı aqqındaki haber, fikirimce, pek müimdir. Bu, eñ yüksek noqta degil de, areket etmemizniñ başlanğıcıdır.
Onıñ içün şübesiz ki, Qırım platforması Qırımnıñ Ukraina nezareti altına qatqan soñ, yekünlenecektir.

Al-azırda faaliyetiniñ başlanğıcında bu platformanıñ daimiy şekilde çalışa bilmesine hızmet etecek vastalarnıñ meydanğa ketirilmesi pek müimdir, şu cümleden, daimiy şekilde çalışqan Qırım platforması ofisini teşkil etüv, ve, fikirimce, Qırımnı işğalden azat etüv ve ğayrıdan integratsiya etüvni maqsat etip qoyğan leyhalarnı teklif etüv ya da amelge keçirüvni muzakere etmek de mümkündir.

Onıñ içün oraq ayınıñ 23, fikirimce, Qırım mevzusı ile oğraşqan er kes içün pek müim ve bu büyük faaliyetni resmiy şekilde başlatacaq bir kündir”, – dep qayd etti çıqışta bulunğan arada Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç.

Anton Korınevıç Qırım platformasından beklevlerine yekün çekti: ”Keçken seneniñ berim ayından bu küngece ecnebiy elçihanelerniñ 16 eyeti Qırım ile memuriy sıñırnı ziyaret etti. Ümüt etemiz ki, yarın daa bir ziyaret kerçekleşir, biz daimiy şekilde bu faaliyetni alıp baramız. Olar bu qırmızı çizgide turğanda ve yüzlernen metr degil de, onlarnen metr yaqınlığında büyük ariflernen ”Diqqat! Rusiye Federatsiyasınıñ devlet sıñırı” degen yazını körgende, olarnıñ episi Qırımda aslında neler ola yatqanını añlamaq, Rusiyeniñ Qırımda neler yapqanını ve yapmağa devam etkenini añlamaq pek müim olğanını, bunıñ yalıñız Ukraina tarihı degil de, zemaneviy dünyada halqara uquqnıñ eñ büyük ölçüde bozulğanını numayış etken umumdünya tarihı olğanını qayd ete. Ve halqara vesiqalarnen pekitilgen qaidelerge riayet etmege, ümdeler esasında yaşamağa alışqan devletler, elbette, buña qıymet kesmeli. Aynı vaqıtta Mariya hanım Mezentsevanıñ aytqanlarına qol tutmaq isteyim – Qırım tarihı ve Qırım sakinleri aqqındaki islerimiz de pek müimdir.
Fikirimce, Qırım platformasını güzel manada işletirmiz, çeteldeki ortaqlarımız içün Qırım bir ”A4” kâğıtı, ya da elektron mektübi degil de, şahsiy duyğular, şahsiy añlayış ve şahsiy celp etüv doğurğan bir mevzu olmalıdır.

Elbette, Qırım platformasınıñ vastalarını muayyen leyhalarnı amelge keçimek içün işlete bilecegimizge ümüt etem, böyleliknen Qırımnı tezce işğalden azat etmek içün kerçekten de güzel işler yapa bilecegimizni ortaqlarımız da körer.

”Qırımnı işğalden azat etüv strategiyasını amelge keçirüvniñ tışqı siyasiy aleti vazifesini becergen Qırım platforması” mevzusındaki munaqasada iştirak etken diger şahıslar:

• Snaver Seyithalil, vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazirniñ muavini;
• Refat Çubarov, Qırımtatar Milliy Meclisiniñ reisi;
• Mariya Mezentseva, Ukraina halq deputatı, Ukrainanıñ AŞPA-daki Daimiy eyetiniñ başlığı;
• Volodımır Şeyko, Ukrain institutınıñ Baş müdiri.

Moderator: Alina Frolova, Mudafaa strategiyalar merkeziniñ idare başlığı, Qırım platforması Ekspertler ağınıñ azası.