Ukraina Prezidentiniñ Qırım MC Daimiy Temsilciniñ Birinci muavini qayd etti ki, abulqatlarnıñ irişimi olmadan keçirilgen qanunsız tintüvler ve semetdeşlerini qol tutmağa kelgen vatandaşlarnıñ esassız yaqalanması, vaqtınca işğal etilgen Qırımnıñ bügünki vaziyetidir.

“Bügün Rusiye cinayetçileri kütleviy şekilde Qırımnıñ tamır halqına, yanı qırımtatarlağa ücüm etti. 55 bala yaqalanğan babalarnı evde beklemekte, olar ne vaqıt qaytar eken? Qıtada çalışqan uquq qorçalav idareleri tintüvler sebebinden cinaiy işler açtılar, bundan soñ vatandaşlarımıznıñ yağalanuvı içün cinaiy işler açılacaq”, – dep bildirdi Qırımda kütleviy tintüvler ve qırımtatarlarnıñ yaqalanuvı boyunca ”ATR” telekanalına izaatlarını bergen İzet Gdanov.

Onıñ sözlerine köre, işğalcilerniñ işleri yaramay ketkeni içün, olar qırımtatarlarğa qarşı kütleviy cezalavlarğa keçeler.

”İşğalcilerniñ soñki ümüti – Ukrainadaki saylavlarda akimiyetniñ deñişmesidir. Şimdiki Prezident beş yıl devamında halqara seviyede işğalcige ciddiy ve devamlı zararlar ketirdi. Qırımda da qırımtatarlar, etnik ukrainler tarafından da qarşılıq kösterüv artmaqta, közge pek körünmese bile, işğalcilerge anda er kes öz sayğısızlığını köstere”, – dep qayd etti Daimiy Temsilciniñ Birinci muavini.

Temsilcilikniñ nevbetteki adımlarına kelgende ise, İzet Gdanov siyasiy-diplomatik basqı artacağı aqqında haber etti. ”Prezident aytqanlarına binaen, Vatanımıznı azat etmek maqsadınen Qırım mevzusı quvetleştirilecek. Bu bizim umumiy küreşimizdir. Qırımdaki vatandaşlarımızğa boysunmağan mevamları içün teşekkürimni bildirmege isteyim. Biz mıtlaqa ğalebe qazanırmız”, – dep qoştı o.