Noyabr 2 künü 2017 senesi Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin AHIT-nıñ matbuat serbestligi boyunca vekili (MSBV) Arlem bey Dezir (Harlem Desir) ile iş körüşüvini keçirdi. Körüşüv devamında Daimiy Temsilci MSBV-ni Temsilcilikniñ salâhiyetlerinen ve Rusiye tecavuzı ve Qırım yarımadasınıñ işğali şaraitlerinde çezilgen meselernen tanıştırdı. Boris Babin MSBV-niñ diqqatını Qırımnıñ işğalci akimiyeti işğal etilgen ukrain donatmaları ve dalğaları vastasınen şovinizm, milletçilik ve duşmanlıq tili teşviqatına yönelgen em de Halqara telekommunikatsion birliginiñ ve Halqara elektrik bağı birliğiniñ qaidelerini bozğan qanunsız yayınlama faaliyetini yürsetkenine çekti.
MSBV-niñ diqqatı Qırımda devam etken az sayılı faalci-blogerlerniñ ve içtimaiy ağlarda yazğan adamlarnıñ cezalavlarına, vaqialarnıñ mustaqil şekilde aydınlatuvnıñ yasaq etilüvine ve Qırımdan bütün büyük qırımtatar matbuat vastalarnıñ quvulğanına da celp etildi. Boris Babin işğalci akimiyet Cankoy şeeri yanında Qırımdan qıta Ukrainanıñ büyük qısmına teleyayınlarını tarqatmaq maqsadınen yañı televizion qullesini (sözde «Tuzlı göl» leyhası) qurğanını bildirdi. Bunı ise Rusiyeniñ gibrid tecavuzı çerçivesinde Ukrainanıñ informatsion havfsızlığına telüke olaraq adlandırmağa mümkün.
Arlem Dezir Daimiy Temsilcige aytqanına köre, o, Qırımda söz serbestliği meselesini daima köz ögünde tutmaqta, misal olaraq, Qırım gazetecisi Mıkola Semenanıñ taqip etilmesinen bağlı beyanat onıñ MSBV vazifesinde yazğan birinci vesiqası edi. Arlem Dezir oñaytlı şaraitler olsa Qırımnı ziyaret etmege istegenini aytıp, işğal etilgen Qırımdan RF-nıñ qanunsız yayınlavınen ve işğalci akimiyetniñ nezaretinde bulunıp basılğan rayon ve idariy matbut vastalarında nefret tili meselelerinen oğraşmağa, qırımtatar matbuat vastalarınıñ vekillerine mustaqil ve obyektiv yayınlav qurmalarında destek köstermege azır olğanını bildirdi.
Noyabr 2 künü 2017 senesi Ukraina Prezidentiniñ Qırım Muhtar Cumhuriyetindeki Daimiy Temsilcisi Demokratik institutlar ve insan aqları boyunca bürosını (DİİAB) reberiniñ birinci muavini Katarjına Gardaghadze ile körüşip, Temsilcilikniñ DİİAB ile işbirligi imkânlarını muzakere etti. Boris Babin DİİAB-na Temsilcilikniñ yardımı ile memuriy hızmet almaq içün Temsilcilikke muracaat etken ve/ya da Herson vilâyetinde KÇNN-da memuriy sıñırnı keçken Qırım sakinleri arasında sorav keçirmekni teklif etti. Bu maqsadnen em de başqa insan aq-uquqlarınıñ bozuluvlarını közetüvinde DİİAB-nıñ vazifelerini yerine ketirilmesi içün Temsilcilik meraqlanğan cemaat ve halqara teşkilâtlarına körüşme meydançığı vazifesini becermege azır.
DİİAB, insan aqlarınıñ qorçalavı saasında Qırımtatar teşkilâtları ile munasebetlerini inkişaf ettirmeğe ve işğal etilgen Qırımda insan aququqları sıñırlanması şaraitinde asılında uquq qorçalayıcı vazifesini becergen mustaqil advokatlarğa qol tutuv imkâniyetini baqmağa çağırıldı. Katarjına Gardaghadze Daimiy Temsilci teklif etken meseleler boyunca işbirlikke azırlıq kösterdi, aynı zamanda DİİABnıñ leyha faaliyetleri içün maddiy imkânları sıñırlı olğanını bildirdi. Bundan da ğayrı, işğal etilgen Qırımda insan aq-uquqlarınıñ bozuluvlarını qayd etmek ve bu meseleni çezmek maqsadınen halqara teşkilâtlarınıñ birligini qurmağa teklif etildi.