Avgustnıñ 29-nda Ukraina elâk olğan qorçalayıcılarınıñ hatırası aña. Bu kün Ukraina devletiniñ ükümeti tarafından İlovaysk faciasınıñ vaqialarında elâk olğan arbiylerniñ hatırası añmaq içün 2019 senesi qabul etilgen edi.

Vaqialarnıñ hronologiyası

2014 senesi rusiye, Ukraina şarqında arbiy zıddiyetni başlap, vahşiy ve tsinik areketler yaptı.

Avgustnıñ 18-nde ukrain göñülli batalyonları İlovayskqa kirdi ve şeerniñ bir qısmını kontrol altına aldı. 2014 senesi avgustnıñ 23-nden 24-ne keçer gecesi Ukraina territoriyasına rf silâlı quvetleriniñ eñ büyük ücümi oldı. O vaqıt rusiye müim strategik noqta olğan İlovaysk içün küreşe edi, şunıñ içün bütün küçüni işğal etilgen şeerniñ mudafaasına sarf etti. Ukrain göñüllilerine qarşı 3500 rusiye mahsus erkânı, 60 tank, 320 BMD (BMP), 60 top, 45 mina topu ve 5 tankqa qarşı raketa kompleksleri – küçler musaviy degil edi.

24-25 avgust künleri Ukraina İçki işler quvetleriniñ  “Dnipro-1” ,  “Mirotvorets” ,  “Svityaz” , “Herson”,  “İvano-Frankovsk” batalyonları, Milliy gvardiyanıñ  “Donbas” ve  “B”  sektorı batalyonları rusiye silâlı quvetleriniñ sarımına tüşti.

Avgustnıñ 28-nde vaziyet kritik edi. Bu Ukraina tarafını istilâcı devlet ile muzakerelerge başlamağa mecbur etti, onıñ neticesinde rusiye tarafı arbiylerimizniñ telükesiz şekilde çıqması içün “Yeşil koridor” temin etecegini bildirdi.

Avgustnıñ 29-nda saba saat 8:15-te ukrain arbiyleri evelden qurulğan marşrut boyunca areket etmege başladılar. Belli bir vaqıttan soñ ruslar silâsız göñüllilerge ateş açıp, olarnı öldürdi. “Yeşil koridor” rusiyeniñ daa bir yalanı olıp çıqtı ve ukrain arbiyleriniñ çoqusı içün ölümnen aqibetlendi.

Resmiy malümatqa köre, İlovaysk operatsiyası ve ondan soñki “yeşil koridorğa” ateş açılması vaqtında 366 ukrain arbiyi elâk oldı, 429-ı yaralandı, 300 kişi esirlikke tüşti.

Bugünki kontekstte Hatıra künü

Keçken sene, İlovaysk faciasınıñ 10-ncı yıllığında Ukraina Silâlı quvetleriniñ baş komandanı Oleksandr Sirskiy şunı qayd etken edi: “Bu kün bizge daima rusiye istilâcısınıñ hainligi ve satqınlığı aqqında hatırlatacaq, terrorist ve qatiller ile er angi muzakereler ölüm telükesi taşığan bir iş olğanını ve olarğa işanmaq mümkün olmağanını hatırlatacaq”.

Rusiyeniñ tsinizmi alâ daa bütün dünyağa açıq şekilde numayış etilmege devam ete. Bir sıra añlaşmalarnıñ bozuluvı, “mutareke” vaqtında tınçlıq rejiminiñ yerine ketirilmemesi, Ukraina topraqlarınıñ çoqusını işğal etmek ıntıluvı, işğalciler içün alışılqan bir şey oldı.

2022 senesine qadar İlovaysk faciası rusiye-ukraina cenkiniñ eñ büyük faciası sayıla edi, lâkin tam miqyaslı istilâdan soñ, bizler ruslarnıñ vahşiyetlerini qıyaslamağa toqtattıq – Rusiyeniñ hastalıq fikirleri ve ahlâqsız areketleri o qadar çoq oldı ki, ukrainlerni şaşırtacaq iç bir şey yoq kibi körüne, sanki bütün mümkün olğan ağrılar endi keçti. Amma er seferinde olar yañı bir şey tapıp çıqara.

Al-azırda Ukrainanı qorçalağanda elâk olğan askerlerimizniñ sayısı tam olaraq belii degildir. Bu faraziy raqam ukrain milleti içün pek büyük bir ğayıptır, bunı er kün hatırlamaq kerekmiz. Arbiylerimizniñ ve qorantalarınıñ yapqan fedakârlıqları iç bir vaqıt unutılmaycaq ve cemiyet olaraq bizim borcumız – Ukrainanı qorçalap, canını feda etkenlerge layıq olmaq.