2018 senesi çiçek ayı (aprel) 6 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov iş keñeşi şekilinde ‘‘Desyate Kvitnya’’ cemaat teşkilâtınıñ Herson ve Odessa şeerlerinden vekilleri Elvira Zaytullayeva, Anna Naydönova ve Artem Çervonıy ile körüşti. Körüşüv esnasında musafirler faaliyetleriniñ esas yönelişleri ile tanıştırdı – BMT qaçaqlarnıñ aq-uquqları Yuqarı komissar İdaresiniñ qoltutuvı ile yürütilgen ‘‘Memleket içinde mecburen köçken şahıslarğa uquqiy yardım ve Ukrainanıñ cenübindeki cemiyetleriniñ imkânlarını ve aqlarını keñişletüv’’ leyhası çerçivesinde teşkilât memleket içinde köçip kelgen şahısarğa, olarnıñ cemaat ve resmiy olmağan birliklerine bedava adliy yardım berüvnen, köçip kelgenlerni qol tutqan içtimaiy, tasil ve gumanitar programmalar aqqında malümat ile paylaşuvnen oğraşa. Bundan da ğayrı, teşkilât memleket içinde köçip kelgen şahıslarnıñ meselelerinen oğraşqan çeşit türlü milliy ve halqara teşkilâtlar ve teşebbüsçi gruppalarnen işbirlik yapa ve köçip kelgenlerniñ meselelerini çeşit türlü programmalarğa kirsetilüvine hızmet ete.

İzet Gdanov musafirlerni Temsilcilikniñ vekâleti ve esas vazifeleri ile tanıştırdı ve bügünde-bügün memleket içinde mecburen köçken şahıslarnıñ çezilüvde Temsilcilikniñ yardımına muhtaç olğan esas porblemalarnı belgiledi. O, Ukraina Yuqarı Şurasına vaqtınca işğal etilgen Qırımnıñ sakinlerine memuriy hızmet ve bedava ekinci nevbet uquqiy yardımnıñ berilüvini, bu cümleden evlenüv qaydını ve Ukrainanıñ vaqtınca işğal etilgen Qırım topraqlarında ölümniñ tasdıq etilmesini qolaylaştırğan qanun leyhası boyunca Ukraina Prezidentine teklifler yollanılğanı aqqında bildirdi.

Birinci muavin vaqtınca işğal etilgen topraqlarnıñ civarlarında Memuriy hızmet merkezlerini teşkil etüv ve Herson şeerindeki ‘‘Dokument’’ devlet muessisesiniñ imkânlarını keñişletüvi boyunca Temsilcilikniñ yerli akimiyet ve öz-özüni idare etüv organları ile işbirligi aqqında ikâye etti. Al-azırda memleket içinde mecburen köçken şahıslarnı vaqtınca içtimaiy mesken ile teminlemek, olarnı yerli cemiyetlerniñ içtimaiy-medeniy ayatına tolu şekilde integratsiya ettirmek, bu cümleden, aliy oquv yurtlarına imtiyazlarnen kirmege, ya da işke yerleşmege yardım etmek maqsadınen Temsilcilikniñ reberiyeti Ukrainanıñ çeşit türlü regionlarda icra akimiyetniñ vekillerinen körüşüvler keçire.

İş körüşüviniñ neticesi olaraq, taraflar memleket içinde mecburen köçken şahıslarnıñ ve işğal etilgen Qırımda yaşağan Ukraina vatandaşlarınıñ meselelerini, bu cümleden, fevqulâde vaziyetlerni çezmek maqsadınen keleçekte sıqı işbirlik ve yardımlaşma aqqında añlaştılar.