Ukraina Prezidenti Petro Poroşenko devletke hainlik yapqan sabıq prezident Yanukoviçke qarşı açılğan cinaiy iş boyunca makeme oturışında iştirak etti. Bu cümleden, devlet Başlığı 2014 senesi fevral ayında Qırım MC topraqlarına yapqan seyaatı ve yarımadada onıñ közleri ögünde olıp keçken vaqialar aqqında ikâye etti.

Petro Poroşenko aytqanlarına köre, ‘‘Qırımda ve Aqmescitte yüz bergen vaqialarnı ögrenip, qanunsız referendumnıñ ilân etilmesinden başlanğan viran etici ceryanlarnı toqtatlaq ve deputatlarnı ikna etmek içün’’ o, 2014 senesi fevral 27 künü Ukraina Yuqarı Şurasınıñ başlığı ve Ukraina Prezidenti vazifesini vaqtınca becergen Oleksandr Turçinovnıñ avalesi boyunca, deral Qırımğa barıp, Qırım Yuqarı Şurasınıñ deputatları ile muzakereler keçirmege teklif etti.

Prezident qayd etti ki, oña ‘‘Ukraina Yuqarı Şurasınıñ adından Qırım MC-de siyasiy vaziyetni doğurtmaq içün muzakereler keçirmege’’ vekâletler berilgen edi. O makemege mütenasip vesiqanı taqdim etmege azır olğanını da bildirdi.

Bundan ğayrı, Prezident tafsilâtlı şekilde Qırımğa seyahatını tasvir etti. Bu cümleden, Qırım MC-niñ Yuqarı Şurası çalışmağanını şahsen körgen edi. ‘‘Onıñ çevre-cetini sözde ‘‘eşil adamçıqlar’’, yani RF ordusınıñ askerleri ve özüni ‘’Qırım samooboronası’’, yani “öz-özüni qorçalav küçleri” olaraq adlandırğan, amma RF mahsus hızmeleriniñ zabitleri tarafından yönetilgen adamlar sarıp alğan edi’’, – dep qayd  etti Petro Poroşenko. Bunıñ episini şu yerde bulunğan jurnalistler öz kameralarına çıqarğan ediler.

Devlet bağlığı aytqanlarına köre, yuqarıda añılğan şahıslar, bu cümleden, Rusiyeniñ askerleri, onıñ Yuqarı Şuranıñ binasına kirmesine keder ettiler. ‘‘O vaqıt meni başta onlarca, soñra ise yüzlerce adamlar sarıp aldı. Olarnıñ bir qısımı provokator edi, olar meni urmağa, sıqıştırmağa, qorqutmağa tırıştı. Amma diger qısım meni qorçaladı. Eminim ki, o vaqıt menim ayatım kerçekten de telüke altında edi. Ve yanımda bulunıp, meni qorçalağan adamlarğa teşekkür etem. Bundan ğayrı, anda bir qaç militsiya hadimi de bar edi. Fursattan faydalanıp, olarğa da teşekkür etmege isteyim, çünki bu militsiya hadimleri öz vazifelerini namusnen eda etmege tırışa ediler’’, – dep qayd etti Prezident.

‘’Men şahsen yeşil urbalarğa kiyingen askerlerni körgen edim – olar Rusiye Federatsiyasınıñ Qaradeñiz flotunda hızmet etken, ya da o künlerde, fevral 20-den başlap, Ukrainanıñ topraqlarına, Qırım MC-ne Ukrainanıñ mütenasip ava ve deñiz limanlarından, Ukraina devletiniñ ruhsetini almadan Rusiyeden keçerilgen askerler edi. Kerekli protseduralardan keçmediler, bunı ‘‘mustaqil ve bağımsız Ukraina topraqlarınıñ istilâsı ve qanunsız ilhaqı’’ dep adlandırmağa mümkün. İşte bularnı men Qırımda, Aqmescitte öz közlerimnen körgen edim,’’ – dep bildirdi Petro Poroşenko.

O qayd etti ki, ava limanınıñ hadimleri oña bildirgenlerine köre, avada arbiy küçlerni taşığan belgisiz uçaqlar uça edi.

Bundan da ğayrı, Ukrainanıñ resmiy menbalarda ve matbuat vastalarında ukrain arbiy qısımlarına üçüm etmege, ukrain gemilerni zapt etmege, ukrain arbiylerine, vatanperverlerine, qırımtatarlarğa başqı yapmağa tırışğanları aqqında defalarca haber etildi. Onıñ içün bütün bu areketlerni RF-nıñ arbiy küçleri tarafından halqara uqunuñ bozuluvı ve bağımsız ve mustaqil devletke qarşı istilâ olaraq adlandırmağa mümkün.

‘’Halqara uquqnıñ noqtaiy-nazarından istilâci devlet olğan Rusiye Federatsiyasınıñ fevral 20-den başlağan bütün areketleri qanunsız edi. Eminim ki, Rusiye Federatsiyası tarafından Ukrainağa üçüm etmege qararnı alğan adamlarğa bu suallerni bermege imkânımız daa olur’’, – dep qayd etti Prezident.

Petro Poroşenko BMT Baş Assambleyası ta 2014 senesi qabul etken Rezolütsiyası ile Rusiyeni istilâcı olaraq tanığanını ve Qırımnıñ işğalini kesen-kes takbih etkenini hatırlattı.

‘’Asılında bu er ukrain vatandaşı ve er siyasetçi içün bir lakmus meselesidir. Bu sualge olar cevap bermeli. Qırım – ukrainankimi? ‘’Ya da, rusiyeliler aytqanı kibi, ‘’Qırım – bizimkimi’’? Asılında, olarnıñ episi bu şekilde tüşünmey. Ukrainadaki vaqialar bu davamı, vatandaş cenkimi, ya da Rusiye Federatsiyasınıñ istilâsımı? Askerler ve tınç eali safından on binlerce qurban – bu vatandaşlıq cenkiniñ neticelerimi, ya da istilâcınıñ yapqanlarımı?’’, – dep qayd etti devlet Başlığı.

O hatırlattı ki, Rusiyeniñ bağımsız ve mustaqıl Ukrainağa qarşı gibrid cenkiniñ daa bir cebesi – bütün dünyağa darqatmağa tırışqan propagandasıdır. Bu cümleden, Qırım Rusiyeniñ olğanını, Ukrainada ise vatandaş cenki ketkenini ve Ukrainadaki qurbanlar – bu vatandaş cenkiniñ qurbanları oğanını iddia ete.

Prezident qayd etkenine köre, al-azırda ukrain tarafı çeşit türlü makemelerde, bu cümleden, BMT Halqara makemesinde baqılğan cinaiy işer boyunca çoqtan-çoq isbatlar topladı. Bu cümleden, Rusiye terrorizmni desteklegeni, deñiz uquqını ve Irqiy diskriminatsiyanıñ bütün şekillerini yoq etilmesine dair konventsiyanı bozğanı aqqında söz yürsetile.

‘‘Onıñ içün, menim fikirimce, bu yalıñız siyasiy, ya da havfsızlıq meselesi degil, aynı vaqıtta bu uquqiy meseledir. Bu cümleden, bügün olayatqan ceryan tek Ukraina içün muim degil’’, – dep yekün çekti devlet Başlığı. Ve bu sebepten o bügünki makeme oturışında iştirak etmege qarar alğan eken