2018 senesi arman ayı (avgust) 9 künü Melitopol şeerindeki medeniyetler arası ‘‘Qale’’ müzeyinde Temsilcilikniñ, Qırımtatar Milliy Meclisiniñ, regional ve yerli meclisleriniñ, Zaporijya vilâyeti devlet memuriyetiniñ, Qırımtatar resurs merkeziniñ, qırımtatar halqınıñ vatanına avdet etmesine qol tutqan ‘‘Azat’’ Melitopol komitetiniñ, Melitopol şeerindeki ‘‘Camaat’’ milliy-medeniy karaim cemiyetiniñ qol tutuvınen Dünyanıñ tamır halqları BMT halqara künü munasebeti ile ‘‘Üç halq – bir tamır’’ mevsuzında içtimaiy-medeniy forum keçirildi.

Borıs Babin öz çıqışı esnasında tamır halqlarnıñ aq-uquqları saasında halqara standartlarınıñ muimligini ve Ukrainanıñ içki siyasetinde ve qanuniyetinde olarğa riayet etüvniniñ kerekligini qayd etti, vaqtınca işğal etilgen Qırımda istilâcı devlet bu topraqnıñ temel halqlarınıñ aq-uquqlarını bozğanını hatırlattı. Forumnıñ iştirakçileri Ukrainada tamır halqlarınıñ uquqiy mevamına, meselelerine ve isiqbaline diqqat ayırdılar, devlet akimiyeti organlarınıñ ve cemaat teşkilâtlarınıñ munasebetlerinde milletler ara meselesini muzakere ettiler. Forum çerçivesinde Sofiya Yalpaçıqnıñ karaim tilinden dersligi taqdim etildi. Tedbirniñ soñunda qırımtatar ve karaim milliy ve folklor taqımları bayram kontsertini keçirdiler.