2018 senesi qural ay (mayıs) 9 künü Temsilcilikniñ hadimleri, öz-özüni idare etüv organlarnıñ ve cemaatnıñ vekilleri işğal etilgen Qırım ile memuriy sıñırnıñ civarlarında Ekinci cian cenkiniñ qaraman ve qurbanlarınıñ añılmasınen bağlı bir sıra tedbirlerni keçirdi.

Çaplınka rayonınıñ Askaniya-Nova köyünde işğal etilgen Qırımdan memleket içinde köçip, al-azırda şu köyde yaşağan Ekinci cian cenkiniñ iştirakçisine Temsilcilikniñ hadimleri kiçik amma ev hocalığı içün faydalı bahşışnı taqdim ettiler.

Geniçesk rayonınıñ Sçastlive köyünde Ekinci cian cenkiniñ iştirakçileri, cemaat faalcileri ve köy başlığı ile beraberlikte Qırımnı qorçalağan 127-ci batareyasınıñ deñizci-topçularına Geniçesk tepesinde tiklengen abidege çiçekler qoyuldı.

Çaplınka rayonınıñ Novovolodımırivka köyünde Qırımnıñ mudafaası ve azat etilüvi devamında elâk olğan askerlerniñ umumiy qabirine çiçekler qoyuldı. Bundan da ğayrı, Qalançaq rayonınıñ Preobrajenka köyünde 2014 senesinden başlap Vatannı rusiye istilâsından qorçalap elâk olğan Qırım sakinleriniñ hatırasına tiklengen taşqa da çiçekler qoyuldı.